اجیت روڈ بٹھنڈہ: ملکیت سنگھ مچھانا

 بزمِ افسانہ کی پیش کش 

سترہواں ایونٹ 

رنگ و آہنگ 

افسانہ نمبر : 04 

          *اجیت روڈ بٹھنڈہ*

                ملکیت سنگھ مچھانہ 

میں جس سڑک پر اس وقت خراماں خراماں چل رہا ہوں وہ بٹھنڈہ شہر کی اجیت روڈ ہے۔ بٹھنڈہ ہندوستان کے شمالی صوبہ پنجاب کا ایک مشہور و معروف شہر جہاں کبھی ملکہ ہندوستان رضیہ سلطانہ قلعہ نشین رہی تھیں۔ باقی شہروں کی مانند یہاں بھی لاتعدادسڑکیں ہیں مگر یہ سڑک یعنی’ اجیت روڈ بٹھنڈہ ‘  نمایا ں اور اپنا ایک خاص الخاص مقام رکھتی ہے۔ فوجی چوک سے لے کر گھوڑے والا چوک ہوتے ہوئے آگے گورودوارہ صاحب بی بی مہاتمہ تک جو تقریباََ دو کلومیٹر کی طوالت پذیر ہے۔

آپ کا تجسس بڑھ رہا ہوگا کہ اس سڑک پر ایسا کیا ہے جو اس کو ممتاز و منفرد مقام بخشتا ہے ۔  جی جناب !  یہاں بزاز خانہ ہے اور نہ کوئی لوہا بازار۔ یہ کریانہ مارکیٹ بھی نہیں اور نہ ہی یہاں کوئی سبزی یا مچھلی فروش بیٹھتے ہیں تو پھر  ...  ! !!  ؟؟؟

ہاں جی ہاں .... اس سڑک پر تو بس !  IELTS (International English Language Testing System) کی دکانوں کی ریل پیل ہے ... ان کو درس گاہ کہناکسی بھی پہلو سے واجب نہیں کیوں کہ یہاں یہ ’کورس‘ پڑھایا نہیں بلکہ بیچا جاتا ہے اور وہ بھی بہت اونچے داموں پر۔ ایک ایک دکان کی تین تین منزلوں پریہاں یہ  ’تجارت ِ علم ‘  گام فرسا ہے اوریہ ایساکاروبارہے جو آئے دن نشو و ارتقا پا رہا ہے۔

بارش نے ذرا تازہ تازہ سانس لی ہے۔ موسم کافی خوشگوار ہو گیا ہے ..... میں نے ابھی گھوڑے والا چوک کراس کیا ہے اور فوجی چوک کی جانب بڑھ رہا ہوں۔۔۔

  ہیَں  ! کہاں جا رہا ہوں  ؟  یہ سب آپ کو آگے چل کر خود بخود پتہ چل جائے گا .... پہلے آپ ان دکانوں کےنام کےفلیکس بورڈ دیکھیے ..... بارش میں دھُل کر کتنے نکھر گئے ہیں ، لگتا ہے ابھی آویزاں کیے ہیں۔

ملکی نظام اور نصاب ِتعلیم ہی ایسا نافذ کیا گیا ہے کہ یہاں تعلیم یافتہ ہونے کا مطلب محض حصول معاش ہے .....  زندگی کے ہر شعبے میں رشوت خوری، بد دیانتی اور کنبہ پروری اس قدر سرفراز ہو گئی کہ آزادی حاصل کرنےکے پونی صدی کے بعد ہی یہاں کی معاشی حالت چرمرا گئی ہےاور بڑے بڑے سرکاری اداروں کو کوڑیوں کے بھاؤ متمول گھرانوں کو بیچا جا رہا ہے۔ حکومتوں بالخصوص صوبائی حکومتوں کا تو دیوالہ نکل گیا ہے جس نےتعلیم یافتہ اہل اور بیدار مغذ لوگوں کو نوکری فراہم کرنے سے ٹکا سا جواب دے دیا ہے۔ 

مستقبل کی بوسیدہ تصویر کے زیر نظر،  پلّس ٹو پاس کرنے کے بعداب پنجاب کا ہر طالب علم بیرون پرواز کر جانےپر آمادہ ہے۔ پلّس ٹو کے بعد کے اعلیٰ تعلیم فراہم کرنے والےاسکول کالجز اب یہاں خالی خالی نظر آ رہے ہیں۔ سرکاری کالجوں میں تو ابھی بھی کچھ رونق میلہ باقی ہے جن میں معاشرے کے پچھڑے درجے کے بچوں کی فراوانی ہے یا وہ بچے ہیں جن کاباہر جانے کا کوئی جگاڑ نہیں بن پا رہا ہے مگر نجی کالج توتقریباََ بند ہو گئے ہیں یا پھر بند ہونے کی کگار پر ہیں۔ معدود ِ چند فیس اور سلانہ اخراجات وغیرہ آدھے سے بھی زیادہ کم وصول کرکے اپنی بقاء کے لیے ہاتھ پاؤں مار رہے ہیں ۔

اس سڑک پر جہاںاس ’تجارت ‘  کے سبب اتنے سارے طلباء کا جم غفیررونق افروزہے تو یہاں پھر مختلف اقسام کے خورد ونوش نہ دستیاب ہوں یہ ممکن ہی نہیں۔ آلو کے پراٹھوں کے لیے تو  ’ بابے کا ڈھابہ ‘ مشہور ہے۔ وہاں ’جلدی ‘ کو کوئی جگہ نہیں ۔۔۔ سب کچھ باری سےملتا ہے۔ اس کے علاوہ فاسٹ فوڈ کی بھی بہت ساری دکانیں ہیںجہاںطلبا ء برگر ،  پیژہ اور نوڈل وغیرہ کا لطف لیتے ہیں۔ چائے کے بجائے کافی اور کولڈ ڈرنکس کو ترجیح دیتے ہیں۔ لیز کو  بسکٹوں پر فوقیت حاصل ہے۔

دائیں بائیں سے تقریباََ تیس گلیاںاس سڑک سے منسلک ہیںجن میں زیادہ تر میںان طلباء کے رہنے کے لیے پی.جی.  (Paying Guest)کھلے ہوئے ہیں۔ میری ایک بیوہ کزن سِسٹر نے بھی  ’ خالصہ پی.  جی.‘ کے نام سے یہ کارو بار چلا رکھا ہے۔ یہاں وہ محض لڑکیوں کو ہی یہ سُکھ سہولت مہیا کراتی ہے۔ بہن بتاتی ہے کہ لڑکوںکے مقابلے لڑکیوں کو رکھنا کافی آسان ہوتا ہے، جیسا کہ وہ بالکل شور نہیں کرتیں اور شام سات بجے کے بعد پی .جی. سے باہر جانے کی ضد نہیں کرتیں ۔ وہ لڑکوں سے بہت کم کھاتی ہیں لیکن خرچہ دونوں کا برابر پڑتا ہے۔

’’ اچھا ! ایسا کیسے  ‘‘ میںبڑے تعجب سے پوچھتا ہوں تو بہن جواب دیتی ہے  ’’  لڑکے روٹی چِن کر کھاتے ہیں جب کہ لڑکیاں گِن کر  ‘‘

’’ مطلب  ۔۔۔ ؟  ‘‘

’’  مطلب کہ لڑکوں کو تو کچھ دے دو انھیں ورائٹی سے کوئی مطلب نہیں ہوتا، انھیں تو بس ! شکم سیر ہو کر کھانا ہوتا ہے جب کہ لڑکیاںکھاتی توکم ہیں بس ! جیسے چڑی چونچ بھرتی ہے مگر ناز نخرہ زیادہ کرتی ہیں۔۔۔ ہم نے یہ نہیں کھانا ، ہم نے وہ نہیں کھانا وغیرہ وغیرہ۔۔۔  ‘‘

میں آج یہاں ظہرانے کے لیے پہنچا ہوں اور عشائیہ کے لیے بھی لازماََ آؤں گا۔ جب کبھی میری بیوی دو چار دن کے واسطے مائیکے چلی جاتی ہے تو میں یہاں ہی تشریف لاتا ہوں ..... اگر کسی ڈھابے یا ہوٹل کا رُخ کروں تو میری بہن خاصی ناراض ہو جاتی ہے ..... بات تو اس کی بھی ٹھیک ہے کہ بیس پچیس لڑکیوں کے کھانے میں سے اگر میں ایک بندہ کھا لوں تو کیا فرق پڑتا ہے ۔ لیکن میں اس کی حق تلفی نہیں کرتا اور دیوالی دسہرے کے موقع پر اس کا حق ادا کر دیتا ہوں .....

آج اتوار ہے ۔یہاں پی.جی. میں رہنے والی زیادہ تر لڑکیاں آج گھر پر ہی ہیں۔ کچھ سامنے کپڑے دھونے میں مصروف ہیں۔کچھ کھانا کھانے کے بعد گپ شپ لگا رہی ہیں۔ چلو آج ان سے مل کر ان کا حال احوال پوچھتے ہیں۔ میری بہن کی فرمائش پر چند چلبلی سی، چند شوخ مزاج اور بعض معصوم سی وہ میرے ارد گِرد کرسیوں پر بیٹھ جاتی ہیں۔ چند توقف کے بعد میں سانے بیٹھی لڑکی سے مخاطب ہوتا ہوں..... ’’  بیٹا کیا نام ہے تمھارا  ؟  ‘‘

’’  جی انامکا .... .  ‘‘

’’  کتنا پڑھے لکھے ہو  ؟  ‘‘

’’   جی میں نے پلّس ٹو کیا ہے  ‘‘

’’   ویری گُڈ ..... کہاں سے آئی ہو  ؟

’’  جی سردول گڑھ شہر ضلع مانسہ سے آئی ہوں   ‘‘

’’  بہت اچھا ! آپ کے ماں باپ کیا کرتے ہیں  ؟  ‘‘

’’  جی ٹیچر ہیں  ‘‘

’’ اچھا بیٹا تو پھر یہ  IELTS کرنے کی کیا ضرورت پڑ گئی ۔ کینیڈا جانے کا ارادہ ہے کیا  ؟  ‘‘

’’  جی بالکل انکل جی  ‘‘  یہ بتاتے ہوئے اس کا چہرہ کھل گیا ۔ 

’’یہاں  پلّس ٹو سے آگے کیوں نہیں پڑھنا شروع کیا  ؟  ‘‘  بس !  میرا یہ جملہ ادا کرنے کی دیر تھی کہ انامکا ایک دم چھِڑ پڑی اور پھراس نے رکنے کا نام تک نہیں لیا ..... اس نے میرا مزاج  بھی کچھ بھانپ لیا تھا.....

’’  یہاں انکل جی  !  ‘‘  اتنی سی عبارت کاتلفظ ادا کرتے ہوئے اس کی پیشانی پر کئی شکنیں ابھر آئیں  ...

’’  یہاںاور پڑھ لکھ کر کیا کریں گے  ؟  نوکری تو کوئی ملنی نہیں   ...  

جنرل کیٹاگری والوں کو تو کوئی ویسے ہی نہیں پوچھتا   !!!

بیرونی ملک میںمحنت کا صلہ تو مل جاتا ہے  ...  یہاں تو ہر جگہ استحصال ہی ہوتا ہے  ‘‘

’’  اچھا  ؟  ‘‘  میں نے سب کچھ جانتے ہوئے بھی عنقریب میں پرواز کے لیے پر تول رہے ان ذہین  نُفوس کو کریدنے کی پوری کوشش کی۔

’’  اور کیا انکل جی .... آپ دیکھ نہیں رہے۔ یہاں لڑکیوں کے ساتھ روز کیا ہو رہا ہے ؟ انڈیا تو لڑکیوں کے لیے سیف نہیں ہے  ‘‘  اتنا کہہ کر انامکا خاموش ہو گئی ، اس کے دل و دماغ پہ جیسے کوئی انجانہ سا ڈر طاری ہونے لگا تھا ،  اس کی آنکھیںمجھے مُٹر مُٹر دیکھ رہی تھی  ...

ضلع شری مکتسر صاحب کے گاؤں گدڑبہہ سے آئی ہوئی رمن دیپ کور جس کا باپ کھیتی باڑی کرتا ہے اور ۱۵   ایکڑ زمین کا مالک ہےنے بھی انامکا کے بیان کی زوردار تائید کی۔

پھر میں نے دائیں بائیں براجمان لڑکیوں سے بھی تقریباََ یہی سوالات دہرائے۔ وہ تمام انامکا کے تاثرات سے صد فی صد متفق تھیں اور انھوں نے بول کر اس کی تائید کی۔ ان میں سے کئی لڑکیاں پڑوسی صوبہ ہریانہ کے ضلع سِرسہ سے تعلق رکھتی تھیں جن میں گاؤں پِپلی سے پریتکا شرما،  راجپورہ سے نودیپ کور،  چورمار سے ارشدیپ کور اور سالم کھیڑہ سےجوبن جیت کور شامل تھیں۔

’’  اچھا تو پھر پڑوسیوں میں بھی یہ بیماری پھیل گئی ہے  ‘‘  میں نے ہریانہ والی لڑکیوں سے نظر ملاتے ہوئے طنز اََ کہا۔ اس پر وہ مسکرا پڑیں۔

’’  آپ اتنی دور چل کر آئی ہیں۔وہاں کیا ایسی دکانیںنہیں ہیں  ‘‘  میں نے ان سے سوال کیا۔

’’  نہیں انکل جی..... ہیں تو صحیح مگرایسی نوعیت کی نہیں ہیں..... بٹھنڈہ کی یہ مارکیٹ تو اس کام کے لیے دہلی دکھن تک مشہور ہے  ‘‘  نودیپ نے جواب دیا۔

’’  ہریانہ تو کیا یہاں تو انکل جی ہماچل پردیس ،  راجستھان اور دہلی تک کے بچے  IELTSکا کورس کرنے آتے ہیں  ‘‘

’’  پنجاب کا ایسا کون سا ضلع ہے جہاں سے بچے یہاں نہ آتے ہوں  ‘‘  جوبن جیت نے لقمہ دیا۔

جو لڑکیاں پیچھے بیٹھی تھیں میں نے انھیں آگے آنے کومدعو کیا تا کہ ان کے دل کی بھی کچھ جان سکوں ۔ میری درخواست پر وہ اٹھ کر آگے آگئیں۔

’’  تمھارا کیا نام ہے بیٹا ہے اور کس شہر سے تعلق رکھتی ہو  ‘‘  میں نے ایک سرخی مائل چہرے کی مالک لڑکی سے پوچھا جواپنے سیدھے ہاتھ کی انگشت شہادت کو منہ میں دبا کر کاٹ رہی تھی۔

’’  میرا نام انکل جی جسمیت کور ہے اورضلع موگا سے تعلق ہے میرا  ‘‘

’’ آگے  ؟  ‘‘

’’  میں نے بھی پلّس ٹو کے بعدIELTS کا کورس پاس کر لیا ہےاور اب اسی روڈ پر ایک انسیچیوٹ میں یہی کورس ٹیچ کر رہی ہوں...  ‘‘

’’  اچھا ! تو پھر  ؟  ‘‘

’’  آپ کو سچی بات بتاؤں انکل جی !  ویسے تو میںcardiologistبننا چاہتی تھی مگرگھر کے اور یہاں کے حالات دیکھ کر میں نے یہ ارادہ ترک کردیا  ‘‘ 

’’  وہ کیسے ؟  ‘‘ میں چاہتا تھا کہ جسمیت کھُل کر بولے۔

’’  کچھ کر گزرنے کے بعد بھی آپ کا مستقبل یہاں محفوظ نہیں ہے ...یہاں وہاں رشوت خوری کا بول بالا ہے ...  ہر در و دفتر میں ذلالت آپ کا ماتھا چومتی ہے  ... بس ! یہاں مردم آزاری کے علاوہ کچھ بھی نہیں ہے انکل جی ...  ‘‘

’’ اور بیرون میں  ؟  ‘‘

’’  وہاں انکل جی !  پہلی  بات ...آپ کو جاںفشانی کا پھل ملتا ہے ...  self respectبہت ہے ... سب سے بڑی بات ... لڑکیوں کے لیے وہ ممالک بہت سیف ہیں ...  ‘‘

’’  تم بیٹا اپنا نام بتاؤ  اور کہاں سے آئی ہو  ‘‘ میں نے ایک دوسری لڑکی کی طرف اشارہ کیا

’’  میرا نام مندیپ کور ہے اور میں قصبہ دھنولہ ضلع سنگرور سے آئی ہوں  ‘‘

’’ جو کچھ جسمیت نے بیان کیا ہے تم اس میں کچھ ایڈ کرنا چاہتی ہو  ؟   ‘‘

’’  ہاں جی انکل جی  ...  اس سڑک پر لڑکیوںکو چلنا پھرنا بہت مشکل ہے ... اوباش قسم کے منچلے بے جا مٹر گشتی کرتے ہیں ... ان کو روکنے والا کوئی نہیں ... چشمک بازی سے ذرا باز نہیں آتے  ‘‘

’’  وہ تو انکل جی جارحانہ طور پرلڑکیوں کے ساتھ جاکر کلاس میں بیٹھ جاتے ہیں  ...!  ‘‘  یہ کہتے ہوئے ہرلین کور کا منہ کھلے کا کھلا رہ گیا۔ 

اپنے مستقبل کو لے کر انھیں تشویش میں مبتلا دیکھ کر میں بھی گہری سوچ میں ڈوب جاتا ہوں۔۔۔

’’ اگر   IELTSمیں اچھے بینڈ آگئے پھر تو بس جہاز کی ٹکٹ ہی خریدنی ہے  ؟  ‘‘  میں نے جسمیت سے نظریں ملاتے ہوئے سوال کیا۔

’’  نہیں انکل جی ! اصل کام تو پھر ہی شروع ہوگا  ‘‘

’’  وہ کیسے  ؟  مجھے ذرا تفصیل سے سمجھاؤ  بیٹا  ‘‘  میں کرسی پر دوبارہ ٹھیک ہو کر بیٹھ گیا۔

’’  کالج کی فیس اور دیگر اخراجات کے واسطے بیس لاکھ روپئے کا انتطام کرنا پڑیگا ۔۔۔ ‘‘  یہ کہتے ہوئے اس کے چہرے پر فکر کی لکیریں طاری ہونے لگیں۔

  ’’  یہ تو بہت مشکل کام ہے  ؟  ‘‘  میرے لب بستہ ہونے پر اتر آئے۔

’’  اس واسطے کوئی  اپنی زمین بیچے گا۔۔۔ کوئی گھر گروی رکھے گا۔۔۔ کوئی ماں اپنے زیور اتار کر دے گی اور کچھ رشتہ داروں اور دوستوں سے ادھار لے لیا جاتا ہے۔ ۔۔۔ آخر انکل جی کینیدا یا امیرکہ تو پہنچنا ہی ہے ۔۔۔  ‘‘  کچھ پیسے ٹکےکے انتظام کا فکر اور زیادہ اپنوں سے بچھڑنے کا درداب ان تمام لڑکیوں کے چہروں پر نمایاں تھا۔

اب اور کچھ پوچھنے کی میرے میں ہمت ہی باقی نہ تھی۔سچ تو یہ تھا کہ میںاب ان سے آنکھ ملانے سے کترا رہا تھا۔ میں نے دونوں ہاتھوں سے سر کو پکڑکر آنکھیںموند  لیں۔

’’  انکل جی !  پانی لیجیے ۔۔۔ ‘‘  میں نے آنکھیں کھولیں، جسمیت سامنے پانی کا گلاس لیے کھڑی تھی۔’’ شکریہ بیٹا  ‘‘ میں نے گلاس مُڑ ٹرے میں رکھتے ہوئے تہہ دل سے جسمیت کا شکریہ ادا کیا۔ خوشگوار ہونے کے باوجود اب موسم میںبلا کی امس محسوس ہو رہی تھی۔

میںاپنے گھر کو لوٹتا ہوا سوچ رہا تھاکہ کیا واقعی ہماری سرکاروں کاجنازہ نکل گیا ہے، ان کی معاشی حالت اتنی ناتاب ہو گئی ہے کہ اپنےذہین فطین نوجوانوں کو روزگار دینے سے قاصر ہیں۔

آپ اندازہ لگا سکتے ہیں کہ یہاں کے فرسودہ مستقبل کومد نظر رکھتے ہوئے کتنے خاندان اپنے دل کے ٹکڑوں کو بیرون ممالک بھیجنے پر مجبور ہیں اور اس حساب سے ہمارے ملک کا کتنا قیمتی سرمایا باہر منتقل ہو رہا ہے۔

یہ اجیت روڈ بٹھنڈہ محض سڑک نہیں ہے ۔۔۔ یہ دو کلو میٹر لمبی ہوائی پٹی ہے جہاں سے،  گھروں کی غربت و مسکنت کے مارے بچے اپنے روشن مستقبل کا تصور لے کر بیرون ممالک کو پرواز بھر رہے ہیں۔۔۔

ہمارے یہاں سب کچھ وافر مقدار میں دستیاب ہے مثلاََ ملک میں معدنیات کی کوئی کمی نہیں۔ صنعت کاری میں انقلاب آیا ہوا ہے۔ گندم، چاول،گنے کی لبالب فصلیں ہوتی ہیں۔ ہمارے برابر آم ، سیب ،سنترہ کہیں بھی میٹھے نہیں ہوتے کیوں کہ ان سب کے لیےسخت دھوپ کی ضرورت ہوتی ہےجس کی باقی ممالک کے بہ نسبت ہمارے یہاںماشاء اللہ فرا وانی ہے۔ تو پھر فرق کہاں رہ جاتا ہے ۔۔۔ ؟؟؟ 

ذرا یاد کرو ہمارے آبا و اجداد کے زمانے کو ۔۔۔ وہ کتنے فخر سے کہتے تھے کہ راج انگریز کا باقی سب جھوٹ۔۔۔  وقت کے پابند، ہر چیز میں ایمان دار

مطلب کہ ہمارے یہاںبرسر اقتدار لوگوں کی  ’نیت ‘ میں فرق آ گیا جو دن بدن کھوٹی ہوتی گئی اور مزید ہو رہی ہے۔۔۔

پھرکیا سوچا آپ نے  ؟؟؟

ہونہہ  !  سوچنا کیا ہے  !!!  جب سب کچھ یہاں موجود ہے تو پھر اپنے جگر پاروںکو باہر بھیجنے کی کیا ضرورت ہے ؟ 

اپنا ایک وفد لے کر ہم خود انگریزوں کے پاس چلے چلتے ہیں۔۔۔ گلے میں پلوڈال کر ان سے گزارش کرلیں گے اور بس ! ۔۔۔

ایک مٹھی بھر انگریز لے آتے ہیں  !!!   ہاں  !  یہاں  !   اپنے ملک میں ۔۔۔

اور شہید اعظم سردار بھگت سنگھ اور ان کے ساتھیوں سے معذرت کر لیں گے۔۔۔ کیا خیال ہے آپ کا  ؟؟؟

                            ختم شدہ ـ