پوش کالونی کے ویران کھنڈر: ڈاکٹر ریاض توحیدی کشمیری

 بزمِ افسانہ کی پیش کش

سترہواں ایونٹ 

افسانہ نمبر : 03 

*پوش کالونی کے ویران کھنڈر*

                                                                                       ڈاکٹر ریاض توحیدی کشمیری 

    وہ ایک معروف پروفیسر تھا۔اس کی شہرت کے چرچے نہ صرف ملک بلکہ بیرونِ ملک میں بھی ہوتے تھے۔اس کی تحریر یں بطور ریفرنس پیش کی جاتی تھیں اور اس کے کئی مقالے عالمی سطح کے رسائل و جرائد میں شائع ہوچکے تھے۔ماہرِ سماجیات ہونے کے ساتھ ساتھ وہ بطورِ محقق بھی کافی مشہور تھا۔ نئے اسکالرزکی کتابوں اور پرجیکٹوں میں شاید ہی کوئی ایسا ہوتا جس میں اس کا حوالہ نہ شامل ہو۔ اسے کئی اعزازات سے بھی نوازا گیا تھا۔ اب جبکہ ضعیف العمری کی وجہ سے وہ کم ہی گھر سے نکلتا تھا‘ تاہم کبھی کبھی اہم سمیناروں میں اسے ضروربلایا جاتا اور وہ بھی حاضر ہوتا رہتا۔اپنی تقریر میں متعلقہ موضوع پر مدلل روشنی ڈالتا اور سامعین بھی معلومات سے محظوظ ہوجاتے۔

    ہم دوساتھی ایک سماجی پروجیکٹ پر کام کررہے تھے۔یہ پروجیکٹ ہمیں ایک این.جی.او کی طرف سے ملا تھا۔ یہ پروجیکٹ مابعد جدید سماج کی زندگی اور انسان کا سکون کے موضوع پر تیار کرنا تھا۔پہلے ہم لوگ یونیورسٹیوں اورسرکاری و غیر سرکاری کتب خانوں میں پروجیکٹ سے متعلق ضروری مواد جمع کرتے رہے۔اس کے بعد فیلڈ ورک کے ساتھ ساتھ مختلف شخصیات سے بالمشافہ ملاقات اور انٹرویوز کا سلسلہ چل پڑا۔اس دوران جتنے بھی ماہرین سے گفتگو کرنے کا موقع ملا‘ ان میں سے بیشتر نے اپنی معلومات اور تجربات کے علاوہ مذکورہ پروفیسر سے رابطہ کرنے کا مشورہ ضرور دیا۔اس طرح سے ہمارے اندر پروفیسر صاحب سے ملنے کاشوق روز بہ روز بڑھتا ہی چلا گیا۔ پروفیسر صاحب سے ملنا ہمارا شوق بھی تھا اور ضرورت بھی‘کیونکہ موصوف نہ صرف متعلقہ موضوع پر ایک اتھارٹی تھے بلکہ اس کے کتب خانے میں اہم کتابوں کاذخیرہ ملنے کا امکان بھی تھا۔ایک دن انہیں یونی ورسٹی کے ایک سمینار میں مدعوکیاگیا تھا۔آج ہم بھی پہلی بار ان کے کلیدی خطبے سے محظوظ ہوئے۔ سمینار کے بعد ہم لوگ ان کے پاس چلے گئے اور اپنا مدعا پیش کیا۔ انہوں نے بڑی خندہ پیشانی سے ہماری بات سنی اور اپنا موبائل نمبر بھی سیو کروایا کہ جب بھی آنا ہو تو پہلے کال کرکے مطلع کریں۔ کئی مہینوں تک ہم فیلڈ ورک میں مصروف رہے کیونکہ ہمیں شہروں کے علاوہ قصبہ جات کے ساتھ ساتھ دیہاتوں سے بھی معلومات اکٹھا کرنا تھیں‘اس لئے بہت ساری جگہوں کے چکر کاٹنے پڑے۔ سروے کے دوران ہم نے پایا کہ شہر یا قصبوں کے برعکس دیہاتوں میں ابھی بھی مشترکہ خاندانی نظام موجود ہے اور وہ لوگ بڑی خوشحال زندگی بھی گزار رہے ہیں۔کئی جگہوں پر ہم نے ایک ہی گھر میں بیس سے لیکر تیس تیس لوگ اکھٹا رہتے دیکھے اور ہر ایک کی زبان پر گھر کے بزرگوں کی تعریفیں سنیں۔ جب ہمارے پاس کتب خانوں اور دیگر ذرائع سے بہت حد تک مواد جمع ہوگیا تو پروفیسر صاحب سے ملنے کا مشورہ ہوا۔ پروفیسر صاحب سے اتنے دنوں کے بعد ملنے کا ایک مقصد یہ بھی تھا کہ اس کے ساتھ ایک ہی ملاقات میں کام نہیں چلے گا بلکہ ہمیں بار بار اس کے مشوروں اور راہنمائی کی ضرورت پڑے گی۔  

    ایک دن صبح سویرے میں نے پروفیسر صاحب کو فون کیا۔کال رسیو کرنے کے بعد سلام دعا کے ساتھ ہی میں نے اپنا تعارف دیااور ملاقات کا بھی پوچھا۔ پہلے وہ چند لمحات تک سوچتے رہے اورپھر پوچھ بیٹھے کہ مجھے یاد نہیں آرہا ہے تو میں نے جب سمینار کا حوالہ دیتے ہوئے اپنے پروجیکٹ کے بارے میں بھی بتادیا تو وہ ہاں ہاں یاد آیا کہتے ہوئے ہنس پڑے اور ملاقات کا وقت بھی دے دیا۔دوپہر کے وقت ہم لوگ پوش کالونی پہنچے اور پروفیسر صاحب کے گیٹ پر موجود بیل بجائی۔چند لمحات کے اندر گیٹ کھل گیا۔اندر داخل ہوتے ہی ایک نوجوان نے پُرتپاک انداز سے ہمارا خیرمقدم کیا اور اپنے ساتھ پروفیسر صاحب کے کمرے کی طرف لے گیا۔ چلتے چلتے دائیں جانب سے ایک کتے کے غرانے کی آواز بھی سنائی دی۔شاید اس نے اجنبیوں کو دیکھ کر اپنی وفاداری کا اظہار کردیا۔شکل و صورت اور آواز سے کتا بدیسی لگ رہا تھا۔ہم جب پروفیسر صاحب کے کمرے کے پاس پہنچے تو کتا ہم سے پہلے ہی کمرے میں داخل گھس گیا۔پروفیسر صاحب کرسی پر بیٹھے تھے۔ہمیں دیکھ کر وہ پُرمسرت انداز سے اٹھ کھڑے ہوئے اور ہاتھ ملاتے ہوئے بیٹھنے کا اشارہ بھی کیا۔ہم بھی شکریہ کرتے ہوئے کرسیوں پر بیٹھ گئے۔سامنے میز پر چند کتابیں‘قلم کاغذ اور لیپ ٹاپ تھا۔کمرے کی کھڑیاں خوبصورت پردوں سے سجی تھیں۔کمرے میں ایک  لائبریری بھی تھی۔ اس کے علاوہ دیوار پر فریم میں چند تصویریں تھیں جن میں پروفیسر صاحب کے ساتھ ایک عورت اور دوبچوں کے مسکراتے چہرے بھی نظر آرہے تھے۔ اسی دوران ایک بزرگ خاتون بیساکھی کے سہار ے کمرے میں داخل ہوئی اور کیا حال ہے بچو کہتی ہوئی صوفہ پر بیٹھ گئی۔ خاتون کو دیکھ کر ہم نے دوبارہ تصویر کی طرف دیکھا۔اس سے پہلے ہم کچھ کہتے پروفیسر صاحب بول پڑے کہ یہ میری بیوی ہے۔یہ بھی لیکچرر تھی۔ایک دن باتھ روم میں اسے چوٹ لگی تب سے بیساکھی کے سہارے چلتی پھرتی ہیں۔یہ سن کر بزرگ خاتون مسکراتے ہوئے ہماری طرف دیکھنے لگی اورپوچھ بیٹھی کہ آپ لوگ کس پروجیکٹ پر کام کررہے ہیں۔یہ سن کر ہمیں محسوس ہوا کہ پروفیسر صاحب نے ہمارا ذکر گھر میں کیا ہے۔ہم نے جب پروجیکٹ کی تھوڑی بہت جانکاری دے دی تو نوجوان بھی چائے لیکر دوبارہ حاضر ہوا۔۔چائے پینے کے دوران پروفیسر صاحب کی بیوی نے نوجوان کی طرف اشارہ کرتے ہوئے کہا کہ نذیر بیٹا ہماری دل سے خدمت کرتا ہے۔کئی برسوں سے ہمارے گھر میں ہے۔ یہ گاوں کا رہنے والا ہے لیکن لگتا ہے کہ اب ہمارے ہی گھر کا فرد ہے۔پہلے اس کا باپ ہمارے ہاں کام کرتا تھا پھر جب وہ بوڑھا ہوگیا تو انہوں نے اسے ہمارے گھر پر یہ کہتے ہوئے چھوڑا کہ مالک اور مالکن کی خدمت اپنے والدین کی طرح کرتے رہنا اور یہ لڑکا برابر باپ کی نصیحت پر عمل کرتے ہوئے ہماری خدمت کرتارہتا ہے۔ تعریفیں سن کر نذیر کا سینہ چوڑا ہوگیا اور وہ مسکراتے ہوئے کیتلی اور پیالیاں اٹھا کر لے گیا۔اس کے ساتھ ہی پروفیسر صاحب بھی نذیر کی ستائش کرتے ہوئے بولے کہ ہاں میری بیوی صحیح کہتی ہیں۔نذیر دل و جان سے ہماری خدمت کرتا ہے۔ہم میں سے اگر کوئی تکلیف میں ہو تو یہ اپنی اولاد کی طرح تڑپ اٹھتا ہے۔کبھی کبھی ہمیں ایسا لگتا ہے کہ یہ ہمارا خدمت گار نہیں بلکہ اپنا بیٹا ہے اور سچ بھی یہی ہے اپنا وہی ہوتا ہے جو اپنائیت اور محبت سے پیش آئے۔

  کئی اور باتیں ہونے کے بعد بنیادی موضوع کی بات چھڑ گئی۔ پروفیسر صاحب پوچھ بیٹھے کہ اچھا منظور صاحب اب آپ مجھے بتائیں کہ پروجیکٹ کا کام کہاں تک پہنچا۔آپ لوگوں نے اس دن کہا تھا کہ پہلے ہم ضروری مواد اور ڈاٹا جمع کریں گے۔اب تو بہت عرصہ ہوگیا۔ میرے خیال میں بہت کچھ جمع ہوا ہوگا۔ پہلے مجھے تفصیل دکھائیں اگر بنائی ہے تاکہ میں بھی کچھ سمجھ سکوں کہ آپ لوگ کہاں تک پہنچے ہیں۔یہ سن کر میری دوسری ساتھی زاہدہ نے بیگ سے کاغذات نکالے اور ہم لوگ بالتفصیل تحقیقی مشق اور جمع شدہ مواد کے بارے میں بتاتے رہے۔ اسی دوران پروفیسر صاحب کی بیوی دوسرے کمرے میں چلی گئی۔تقریباََ تین گھنٹے تک پروفیسر صاحب کاغذات دیکھتے رہے اور ہماری تحقیقی کاوشوں کا جائزہ لیتے رہے۔پورا جائزہ لینے کے بعد پروفیسر صاحب نے اطمینان کا اظہار کرتے ہوئے کہا کہ اس پروجیکٹ پر آپ لوگوں نے کافی ہوم ورک کیا ہے۔ اب جو کچھ ضرورت پڑے گی تو اس سے متعلق آپ کو میری لائبریری سے مواد مل سکتا ہے اور باقی کام بھی ہوتا رہے گا۔ اہم چیز فیلڈ ورک ہے جو آپ لوگوں نے بخوبی انجام دیا ہے۔پروفسیر صاحب کی حوصلہ افزائی سے ہماری ہمت بندھ گئی۔چند اہم ہدایات سے نوازنے کے بعد پروفیسر صاحب فرمانے لگے کہ آپ لوگوں کی محنت‘قابلیت اور زندہ دلی دیکھ کر دل خوش ہوا‘اس لئے آپ لوگ کبھی اور کسی بھی وقت بلاتکلف یہاں پر آسکتے ہیں اور آنا تو ضرور ہوگا کیونکہ یہ آپ لوگوں کی مجبوری بھی ہے لیکن پہلے فون پر رابطہ کرتے رہنا۔ یہ سن کرہم لوگ مسکرا اٹھے اور شکریہ ادا کرنے کے ساتھ وہاں سے نکل گئے۔ 

  گیٹ سے نکلنے کے بعد ہم نے کالونی پر ایک سرسری نظر دوڑائی۔ہرطرف کئی کئی منزلوں کے محل نما خوبصورت مکانات نظر آئے۔لیکن اتنی خوبصورت کالونی کا ماحول جنگل کے سناٹے جیسامحسوس ہوا۔ کیونکہ بستی کی چہل پہل کہیں سے بھی نظرنہیں آئی۔ تھوڑا چلنے کے بعد ایک خوبصورت پارک پر نظر پڑی۔وہاں کے بنچوں پرچند بزرگ محوِگفتگونظر آئے۔ کچھ اونگھ بھی رہے تھے۔ پارک میں موجود لوگوں کو دیکھ کر زاہدہ بولی کہ چلو ان کے ساتھ تھوڑی بہت بات کریں۔ میں نے انکار کرتے ہوئے بتایا کہ پھر کبھی دیکھیں گے لیکن باہمی مشورے کے بعد پارک کی طرف چل پڑے کہ کسی نہ کسی بزرگ سے بات ہوجائے اور پروجیکٹ سے متعلق کچھ جانکاری بھی مل سکے۔جب ہم پارک میں داخل ہوگئے تو بزرگ لوگ ہمیں دیدے پھاڑ پھاڑ کردیکھنے لگے۔پتہ نہیں انہوں نے کیا سمجھا لیکن جب ہم ان کے قریب پہنچے تو وہ ایک دوسرے کے چہروں کو استفہامیہ نظروں سے تکنے لگے۔جب علیک سلیک ہونے کے ساتھ ہم نے اپنا تعارف کرایا تو ان لوگوں کی حیرت دور ہوگئی اور بات چیت کرنے کے لئے آمادہ ہوگئے۔ہم نے بیٹھتے ہی پارک کا ایک جائزہ لیا۔کئی لوگوں کے علاوہ چند کتے بھی درختوں کے سایوں میں گم سم بیٹھے تھے۔ بیشتر کتے بدیسی نسل کے لگ رہے تھے اورہر ایک کے گلے میں زنجیر کے ساتھ ساتھ پٹابھی لگا ہوا تھا جس پر کتوں کے نام کے ساتھ انسانوں کے نام بھی رقم تھے۔ میں نے جب اپنے پروجیکٹ کے حوالے سے بات شروع کی‘ اس کے مقاصد پر مختصر روشنی ڈالی اور ساتھ ہی پروفیسر صاحب سے ملاقات کے بارے میں بتایاتو ان میں ایک بزرگ‘جس کی داڑھی اور سر کے بال پورے سفید ہوچکے تھے‘ نے اپنا تعارف بطور سبکدوش ایگزیکیٹیو انجینئر دینے کے ساتھ ساتھ ہنستے ہوئے کہا کہ اچھا آپ اپنے پروفیسر گلشن صاحب کی بات کررہے ہیں۔وہ بھی تو اپنی برادری کے آدمی ہیں اور یہاں پر اکثر آتے رہتے ہیں۔بھئی ان کی ایک خوبی تو دل چھو لیتی ہے کہ جب بھی کسی سوشل ایشو پر گفتگو کرتے رہتے ہیں توہم لوگوں کے علم میں بھی اضافہ ہوتا ہے اورتھوڑے دیر تک راحت کی سانس بھی لیتے ہیں۔یہ سن کر ایک بار پھر ہمارے دلوں میں پروفیسر صاحب کی قابلیت اور عزت کا گراف بلند ہوا۔اب ہم نے پہلے انجینئر صاحب سے ہی گفتگو کا سلسلہ شروع کیا کہ آپ لوگ پوش کالونی کے مکین ہیں تو ظاہر سی بات ہے کہ آپ لوگوں کی زندگی خوشحال ہوگی‘یہاں پر زندگی کی جدید سہولیات دیکھ کر لوگ پوش کالونیوں میں گھر بنانے کی تمنا کرتے رہتے ہیں۔ پہلے انجینئر صاحب اور دوسرے لوگ یہ سن کر مسکرائے پھرانجینئر صاحب نے بڑے فخر سے کہا کہ جی آپ صحیح فرماتےہیں کہ ایسی کالونیاں جدید سہولیات کا نمونہ ہوتی ہیں اور یہاں پر کم آمدن والے لوگ گھر بنانا تو کیا زمین کا ایک چھوٹاسا ٹکڑا تک خریدنے کے بارے میں سوچ بھی نہیں سکتے ہیں۔ یہ سن کر ہم دونوں نے اثبات میں سر ہلائے اور اب زاہدہ پوچھ بیٹھی کہ اصل میں ہمارا موضوع خاندانی نظام ہے تو اس کالونی کی زندگی اور رہن سہن کے بارے میں تھوڑا بہت بتائیں اور مشترکہ خاندانی نظام جو کہ ہماری تہذیب کا ایک حصہ ہے اور دل کے سکون کا وسیلہ بھی‘پر اپنے تجربات سے نوازیں۔یہ سن کر انجینئر صاحب چند لمحات تک خاموش رہے پھر بول پڑے:

        ”آپ لوگ جدید دور کے بچے ہیں۔اب تو ایسی کالونیوں میں قدیم دور کا مشترکہ خاندانی نظام خواب سا بن گیا ہے۔

           پہلے ایک ایک گھر میں کئی کئی لوگ محبت سے ایک ساتھ رہتے تھے لیکن اب تو دو بھائی بھی ایک ہی چھت کے نیچے اکٹھا

           رہناپسند نہیں کرتے ہیں تو چاچا بھتیجوں کی بات ہی کہاں۔دراصل یہ شاید نئے زمانے کی ضرورت بھی ہے اور ہم جیسے

            پرانی سوچ رکھنے والے لوگوں کی مجبوری بھی‘کیونکہ نئے دور کے ساتھ خود کو ایڈجسٹ کرنا پڑتا ہے۔“

       ”اچھا انکل۔“زاہدہ نے یہ سن کر ایک اور سوال پوچھا.”آپ کے بچے کیا کررہے ہیں‘کیا وہ ایک ہی فیملی میں رہتے ہیں 

          یا الگ الگ گھربسائے ہیں۔“

    ”جی بیٹی“انجینئر صاحب سر ہلاتے ہوئے بولے۔”دراصل میرے دو بیٹے یورپ میں رہتے ہیں۔دونوں کا اپنااپنا بزنس

     ہے۔ویسے پوش کالونی کے بیشتر بچے فائرن کنٹریز میں ہی رہتے ہیں۔اب ایسی کالونیوں میں رہنا کوئی بچوں کا کھیل 

     تھوڑا ہی ہے‘یہاں کا لائف ا سٹائل کافی دولت وشہرت کا تقاضا کرتا ہے جو کہ ہمارے یہاں ممکن نہیں ہے۔ویسے پروفیسر

       صاحب کے بچے بھی تو بیرون ملک میں ہی ہیں‘کیا انہوں نے نہیں بتایا۔“

   انجینئر صاحب کی فخر اساس باتیں سن کر میں نے سوال پوچھاکہ کیا وہ لوگ یہاں پر آتے رہتے ہیں۔اور اپنے والدین کا کتنا خیال رکھتے ہیں۔اب انجینئر صاحب کے بدلے ایک اور بزرگ بول پڑے:

           ”بیٹا ہمارے بچوں کو اتنی فرصت کہاں ہے کہ وہ یہاں پر بار بار آسکیں۔بس زیادہ تر فون پر ہی رابطہ رہتا ہے۔ہاں ایک

             بات ضرورہے کہ انہوں نے ہمارا دل بہلانے کے لئے فائرن سے وہ کتے بھیجے ہیں۔بڑے قیمتی کتے ہیں وفادار

            اتنے کہ ہمیشہ بچوں کی طرح ہمارا خیال رکھتے ہیں۔ہمارے والدین ہماری انگلی پکڑ کر مارنینگ واک کرتے تھے اور ہم

            لوگ ان کتوں کی زنجیر پکڑ کرگھومتے پھرتے ہیں۔ آپ ان محل نما مکانوں میں جائیں تو بچوں کی بجائے ان کتوں سے

           ضرور واسطہ پڑے گا۔آہ‘پتہ نہیں دولت کی ہوس نے انسان کو کیا سے کیا بنا دیا ہے۔“

    بزرگ کی آبدیدہ نگاہیں اورمایوس لہجہ اس کے دل کی اداسی کا واضح اشارہ کررہاتھا۔ان لوگوں سے ملاقات کے بعدہم دونوں رخصت لے کر پارک سے نکل ہی رہے تھے کہ فائرن کتوں کے غرانے کا شور ہمیں اپنی طرف متوجہ کرگیا۔ کتے ایک بلی کے پیچھے دوڑ تے دوڑتے اس پر ٹوٹ پڑے اور اس کی بوٹی بوٹی نوچنے لگے۔بزرگ جس سرسبز وشاداب پیڑ کے سائے میں بیٹھے تھے اس کے اوپر کوئے بلی کی بے بسی دیکھ کر کائیں کائیں کرنے لگے۔میں پیڑ کے سائے میں بیٹھے بزرگوں کے اداس چہروں کو دیکھتے ہوئے سوچنے لگا کہ جیسے بہار ہونے کے باوجود سرسبز و شاداب پیڑ کے پتوں پر خزاں کا اثر دکھائی دے رہا ہے۔

   وہاں سے نکلنے کے بعد ہم دونوں پروفیسر صاحب‘ان کی بیوی اور بزرگوں کی باتوں پر گفتگو کرنے لگے۔زاہدہ نے فخریہ انداز سے کہا کہ آپ تو پارک میں جانے سے انکار کررہے تھے لیکن وہاں پر تو خاص قسم کا مواد مل گیا۔میں نے سر اثبات میں ہلاکرچند تعریفی کلمات کہے  اور دونوں ہنس پڑے۔اس کے بعد کئی بار ہم پروفیسر صاحب کے ہاں چلے گئے اور ان کے کتب خانے کے ساتھ ساتھ گفتگو سے بھی استفادہ کرتے رہے۔جس کی وجہ سے ہمارا پروجیکٹ ٹھوس مباحث کی جانب بڑھنے لگا۔ایک دفعہ جب ہم نے ملاقات کو فون کیا تو وہاں سے پروفیسر صاحب کی بجائے نذیر نے کال رسیو کی اور بتا یاکہ چند روز قبل مالکن کا انتقال ہوگیا اور مالک کافی صدمے میں ہیں۔ ہم لوگ یہ افسوس ناک خبر سن کر غم زدہ ہوگئے اور ایک ہفتے کے بعد جب تعزیت پرسی کے لئے وہاں پرچلے گئے تو نذیر کو گھر میں اکیلے پایا۔ معلوم کرنے پر اس نے بتایا کہ مالک آتے ہی ہونگے وہ ڈاکٹر کے پاس چلے گئے ہیں۔تھوڑی دیر کے بعد نزیر نے جب پانی کے دو گلاس ٹیبل پر رکھے تو میں نے پوچھا کہ ماں کی وفات پر ان کے بچے گھر آئے تھے کہ نہیں۔یہ سن کر نذیر نے سرد آہ بھری اور کہا‘نہیں‘مالک نے انہیں فون پر بتایا تھا لیکن انہوں نے کہا کہ ہم تین چار مہینے تک نہیں آسکتے ہیں کیونکہ یہاں پر کام بہت پڑا ہے اور بچوں کے امتحانات بھی شروع ہورہے ہیں۔ یہ سن کر ہمیں اور زیادہ افسوس ہوا۔نذیر نے چائے کے لئے پوچھا لیکن ہم نے انکار کیا اور تھوڑا بہت ان کے بچوں کے  بارے میں جاننا چاہا۔اس نے کہا کہ مالک  اور مالکن نے اپنے بچوں کی بہتری کے لئے کیا کیا کچھ نہیں کیا ہے اور وہ آج ماں کی خبر سن کر بھی نہیں آئے۔میں نے اپنے باپ سے سنا ہے کہ مالک کسی یونیورسٹی میں پڑھاتے تھے اور اسی یونیورسٹی میں اپنے لڑکے کو بھی پڑھانے پر لگا دیا۔پھر ایک دن یہ امریکہ چلے گئے اور جب واپس آئے تو اپنے لڑکے کو وہاں پر پڑھانے کے لئے بھیج دیا۔پہلے وہ سال میں دوتین بار گھر آیا کرتا تھا لیکن اب صرف فون پر ہی بات چیت ہوتی رہتی ہے۔مالک کی بیٹی ڈاکٹر ہے اور وہ بھی باہر کسی ملک میں اپنے شوہر کے ساتھ رہتی ہیں۔نذیر نے اپنی بات ختم کردی اور گیٹ پرگھنٹی کی آواز بج اٹھی۔نذیر یہ کہتے ہوئے دوڑ پڑا کہ شاید مالک آگئے۔پروفیسر صاحب آتے ہی باتھ روم میں چلے گئے اور وہاں سے فراغت کے بعد ہمارے پاس چلے آئے۔ہم دونوں سلام کرتے ہوئے کھڑے ہوگئے اور انہوں نے سلام کا جواب دینے کے ساتھ ہی ہمیں بیٹھنے کا اشارہ کیا۔ اب ہم نے ماں جی کی وفات پر اظہار افسوس کیا اور بتایا کہ چند دن قبل نذیر نے فون پربتا دیا۔ وہ تھوڑی دیر دیوار پر ٹنگی تصویر کو دیکھتے رہے اور پھر اپنی بیوی کے کئی واقعات سنائے۔اس کے بعد آہ بھرتے ہوئے بولے کہ آخر سبھوں کو تو ایک نہ ایک دن جانا ہے اس لئے صبر کے سوا کوئی چارہ نہیں۔ہم نے جب بچوں کے بارے میں پوچھا تو یہ سنتے ہی پروفیسر صاحب کے صبر کا باندھ ٹوٹ گیا‘آبدیدہ ہوکربول پڑے:

        ”بچوں کی خوشی کی خاطر ہم لوگوں نے کیا کچھ نہیں کیا۔میرا بیٹا جب یونیورسٹی میں اسسٹنٹ پروفیسر بن گیا تو اس کے لئے

           میں نے اپنے ضمیر کو مارکر سیاہ تو سفید اور سفید کو سیاہ کردیاتھا۔لڑکی کے بارے میں باقی کیا کہونگا۔اس کی خوشیوں کی

             خاطرہم نے لاکھوں روپے خرچ کرڈالے تب جاکے وہ ڈاکٹر بن گئیں لیکن آج وہ لوگ دولت و شہرت اوراپنے بچوں 

             کا مستقبل سنوارنے کی دھن میں اپنے ہی والدین کو بھول بیٹھے ہیں۔“

     ہم لوگ بار بار پروفسیر صاحب نے چہرے کو دیکھتے رہے۔وہاں پر ہمیں مایوسی کا جنگل نظر آیا۔پانی پینے کے ساتھ ایک گولی کھانے کے بعد وہ مزید کہنے لگے کہ:

         ”اس پوش کالونی کے بظاہر خوش نظر آنے والے بیشتر لوگ اند ر سے کتنے بیمار ہیں وہ ان کادردبانٹ کر ہی پتہ چلتا ہے۔

         یہ سب آسیب ِ زر کا نتیجہ ہے۔ ہم لوگ مادیت پرستی کی دوڑ میں تہذیبی اور اخلاقی قدروں کو بھول گئے ہیں۔انسان

          جب مادیت کا پجاری بن جاتا ہے تو پھر اس کی حیثیت ایک مشین سے کم نہیں رہتی ہے۔اس کے اندرنہ احساس باقی

          رہتا ہے اور نہ ہی سکون کی خوشبودوڑتی ہے۔یہ اسی مادی تہذیب کا اثر ہے کہ اب آہستہ آہستہ مشترکہ خاندان کے کلچر

           کا خاتمہ ہورہا ہے اور سوسائٹی میں مسابقتی دوڑ شروع ہوچکی ہے جس کی وجہ سے اپنائیت کی بجائے رشتوں کے کھوکھلے

            پن کا چلن عام ہورہا ہے۔“

      پروفیسر صاحب کے لہجے کا اتار چڑھاؤ اور سسکتی آواز کا کرب محسوس کرتے ہوئے میں سوچنے لگا کہ جیسے ہم لوگ ایک فاتح کھلاڑی کے لہجے میں ایک ناکام کھلاڑی کی داستان الم سن رہے ہیں۔ ہم لوگ کافی دیر تک وہاں پر ٹھہر ے رہے اورجب انہوں نے ہمارے کام کے بارے میں پوچھا تو یہ سن کر خوش ہوئے کہ تقریباََ اسی فیصد مکمل ہوچکا ہے۔وہاں سے نکل کر ہم دونوں پر مایوسی چھا گئی اور پروفیسر صاحب کی ذہنی کیفیت پر تبصرہ کرتے ہوئے اس نتیجے پر پہنچے کہ اتنی دولت اور شہرت کے باوجود وہ اندر سے بکھر گئے ہیں۔اس کے بعد ہم کبھی کھبار ان سے فون پر ہی بات کرتے رہتے۔قریباََ پانچ مہینے کے بعد جب میں نے ایک دن فون لگایا تو فون سوچ آف آرہا تھا۔

 میں نے جب یہ زاہدہ کو بتایا توہم نے سوچا کہ شاید ان کے بچے مت آئے ہونگے اور انہیں اپنے ساتھ لے کر چلے ہونگے۔کئی دنوں کے بعد میں نے دوبارہ فون لگایا تو نذیر کی آواز سنائی دی۔نذیر بات کرتے ہی رو پڑا کہ مالک کا انتقال ہوگیا ہے۔میں نے یہ بات جب زاہدہ کو بتائی تو اس کی آنکھوں میں آنسو آگئے۔دوسرے دن ہم لوگ وہاں پر چلے گئے۔نذیر گھر میں اکیلا تھا۔ہمیں دیکھتے ہی اس کی آنکھوں میں آنسوامڈ آئے۔میں نے جب پروفیسر صاحب کی اچانک موت کے بارے میں پوچھا تو وہ کہہ اٹھا کہ مجھے پچھلے مہینے کے آخری ہفتے گھر سے فون آیا کہ باپ کی طبیعت خراب ہے اس لئے جلدی گھر آنے کے لئے کہا گیا۔میں نے جب یہ بات مالک کو بتائی تو وہ بھی پریشان ہوگئے۔  انہوں نے کہا کہ وہ بھی ساتھ چلیں گے۔انہوں نے گاڑی نکالی اور چار بجے کے قریب ہم لوگ گھر پہنچ گئے۔وہاں پر ماتم کا ماحول چھایا ہوا تھا۔ وہ لوگ میرا ہی انتظار کررہے تھے۔میرے پہنچنے کے بعد کفن دفن کا کام شروع ہوا۔ رات کو جب بہت سارے بستی والے اور رشتہ دار گھر پر ہی ٹھہر گئے اور ہر کوئی دلاسہ دیتا رہا تو میں نے محسوس کیا کہ مالک کسی اور ہی عالم میں پہنچ گئے ہیں۔اس غم زدہ ماحول میں بھی وہ خوش نظر آرہے ہیں۔میں جب انہیں ایک ہمسائے کے یہاں رات کو سونے کے لئے چھوڑ گیا تو وہ کہنے لگے اگر چہ اس وقت یہ بات کہنے کی نہیں ہے لیکن میں خوش ہوں کہ گاؤں میں انسان لاوارث نہیں مرتا ہے۔میں سمجھتا ہوں اگر کسی کی اپنی اولاد بھی نہ ہو تو وہ ایسے سماج میں بے بسی سے نہیں مرے گا۔ دوسرے دن مالک شہر کے لئے نکل پڑے اور مجھے بتایا کہ اسے کسی نہ کسی طرح سے فون کرتا رہوں۔چند دنوں تک میں تعزیت پرسی میں ہی مصروف رہا اور ایک دن اپنے ایک ہمسایہ کو نمبر دیکر مالک سے بات کرنے کو کہا۔ فون پر مالک نے خیروعافیت پوچھی اور آنے کے بارے میں بھی کہا۔میں نے کہا آٹھ دس دنوں کے بعد ضرور آونگا۔اس کے چند دن بعد گاؤں میں برف بھاری شروع ہوگئی۔راستے بھی بند ہوگئے پھر جب گاڑیاں چلنے لگیں تو میں نے مالک سے فون پر رابطہ کرنا چاہا تاکہ اسے اپنے آنے کی خبر بھی دوں لیکن فون بند آرہا تھا میں تھوڑا ساپریشان ہوا اور اگلی صبح شہر کی طرف نکل پڑا۔یہاں پہنچ کر میں نے جب گیٹ کھولا تو کتے کی بھونکنے کی آواز آئی۔ میں اسے پچکراتے ہوئے آگے بڑھ گیا تووہ مجھے دیکھتے ہی دم ہلاتے ہوئے دروازے سے ہٹ گیا۔ میں نے کتے کے منہ پر خون دیکھا۔ میں پریشان ہوکر جلدی اندر چلا گیا۔مالک اپنے کمرے میں اوندھے منہ فرش پر پڑے تھے۔ میں نے جب انہیں آواز دیکر ہلایا۔اس کے بعد نذیر کی آنکھوں سے آنسوؤں کی دھار نکل پڑی۔یہ سن کر ہم لوگ بھی اپنے آنسو نہیں روک پائے اور وہاں سے اٹھ کر گیٹ سے نکل آئے۔باہر نکلتے ہی میں پروفیسر صاحب کے حوالی نما مکان کو دیکھنے لگا اور اس کے بعد کالونی کی طرف نظر دوڑائی۔مجھے ایسا محسوس ہوا کہ پوش کالونی کے محل نما مکانات خاموش رہ کر اپنے اندر کے ویران کھنڈرات کا ماتم منا رہے ہیں۔

                      ختم شدہ ـ