ادیب : فرخندہ ضمیر

 بزمِ افسانہ کی پیش کش 

سترہواں ایونٹ 

رنگ و آہنگ 

افسانہ نمبر : 12 

                 *ادیب*

                   فرخندہ ضمیر

 

   شاد صاحب کو جیسے ہی ہوش آیا انھوں نے اپنے آس پاس دیکھا۔۔  آنکھوں اور سر کو ہلکی سی جنبش دی تو انھیں احساس ہوا کہ وہ کئ طرح کے تاروں اور نلکیوں میں جکڑے ہوئے ہیں۔ دماغ پر زور ڈالا تو انھیں کچھ کچھ یاد آیا ۔ پھر سب کچھ روشن ہو گیا ۔ 

ہاں !انھیں یاد آیا ۔ 

بہت شدّت سے انھیں گردے میں تکلیف ہوئ تھی کہ وہ درد کی تاب نہ لاکر  بے ہوش ہو گئے تھے ۔ اور انکا ذہن تاریکیوں میں ڈوبتا چلا گیا تھا۔

"انھیں یہاں کون لایا؟"

وہ درو دیوار کو غور سے دیکھنے لگے۔ 

شیشے کے اس پار سے نرس نے دیکھا تو فورا`قریب آئ ۔ ڈاکٹر بھی جلدی سے قریب آگیا ۔

"آپ ٹھیک ہیں " ڈاکٹر نے ان کی نبض چیک کرتے ہوئے کہا ۔

"جی" شاد صاحب نے نحیف آواز میں کہا ۔

ڈاکٹر نے نرس کو کچھ ہدایتیں دیں اور دوسرے مریضوں کے بیڈ کی طرف بڑھ گئے۔

شاد صاحب ڈاکٹر اور نرسوں  کی مستعدی دیکھ کر، اور جدید  سہولیات سے آراستہ I.C.U،صاف صفائی دیکھ کر سمجھ گئے تھے کہ یہ کوئ مہنگا پرائیویٹ ہسپتال ہے۔ 

"لیکن انھیں یہاں کون لایا؟" یہ ہی سوال انکے ذہن میں بازگشت کرتا رہا۔ 

انکی اتنی حیثیت کہاں کہ وہ اس ہسپتال کے اصرا ف برداشت کر سکیں ۔وہ تو ایک ادیب ہیں ۔ ۔۔  انکے پاس اتنا سرمایہ کہاں ، انھیں تو سرکاری ہسپتال کے علاج میں ہی چھینکیں آجاتی ہیں کہ وہاں صرف ڈاکٹر کی فیس ہی تو نہیں لگتی ۔ دوائیاں وغیرہ تو سب بازار سے خریدنی پڑتی ہیں ۔ وہ ایک اسکول ٹیچر اور ادیب ہی تو تھے ۔ یہ الگ بات ہے کہ انھوں نے کئ اعلی درجہ کی تخلیقات صفحئہ قرطاس پر اتاری تھیں ۔ ادبی دنیا میں انکا مقام تھا ۔  انکی ادبی خدمات پر انھیں ساہتیہ اکادمی ایوارڈ ،میکش ایوارڈ، غالب ایوارڈ وغیرہ سے نوازا گیا تھا ۔ انکے کمرے کے شو کیس میں ایوارڈ کا روز بروز اضافہ ہو رہا تھا لیکن مالی حالت جوں کی توں تھی ۔ ۴بچہّ بیوہ بہن اور اسکے دو بچہ غرض ایک بڑے کنبہ کے وہ پالنہار تھے۔ 

          انھیں احساس تھا کہ اگر وہ ہندی یا انگریزی کے ادیب ہوتے تو انکی زندگی مفلسی کے چراغ کی مانند نہیں ہوتی ۔ وہ بھی شان سے سہیل سیٹھ، چییتن بھگت ، ارودھنتی رائے،نرمل ورما،اشوک واجپئ جیسی شاندار زندگی بسر کرتے ۔ لیکن کیا کریں ان زبانوں پر عبور حاصل تھا لیکن اپنے مزاج سے مجبور تھے۔ مادری زبان اردو سے اس حد تک محبت تھی کہ کسی اور زبان میں لکھنے کا تصوّر ہی نہیں  کر سکتے تھے ۔۔ ذہنی تسکین انھیں اردو سے ہی ملتی تھی ۔ اس لئے مفلسی بھی مقدّر تھی ۔ اردو کے ادیب تو بیچارے اپنی  تخلیقات شائع کرانے کے لئے اپنے گرے کی رقم خرچ کرتے ہیں اور مفت کتابیں بانٹتے ہیں ۔

 جب انھیں ساہتیہ اکادمی انعام سے نوازا گیا اس کے بعد کوئ کوئ میگزین انھیں معاوضہ دے دیتی۔ 

انکی کتابوں کے ترجمہ ملک کی مختلف زبانوں میں ہونے لگے۔ اب انھیں ہندی، انگریزی والے بھی  عزّت کی نگاہ سے دیکھنے لگے ۔ مقبولیت میں بھی اضافہ ہوا،لیکن پھر بھی انکے پاس اتنی رقم نہیں تھی کہ وہ اپنا گردہ  ٹرانس پلانٹ کروا سکتے ۔ تکلیف دن بہ دن شدید ہوتی جا رہی تھی۔ گھر کی بھی ذمّداریاں تھیں ۔ 

  دو بیٹے اور دو بیٹیاں تھیں ۔ انکی تربیت شریکِ حیات نے اچھی کی تھی۔ وہ سیلف میڈ بچّے  تھے ۔اور اپنی پڑھائ کا خرچہ اسکالر شپ اور ٹیوشن سے نکالتے تھے۔ بیوہ بہن کے بچّے بھی ایسے ہی تھے۔ 

ورنہ شاد صاحب تو پھکّڑ قسم کے انسان تھے ۔۔۔۔۔۔ غریبی میں پھاگ کھیلنے والے۔۔۔۔۔

ہمیشہ دوسروں کی مدد کو تیّار رہتے ۔ خاص کر اپنے ادیب دوستوں کی مدد کھلے دل سے کرتے۔ پیسہ سے نہیں تو خدمت سے۔ 

گاندھی اور آزاد کے معتقد تھے ۔ 

"لیکن انھیں اتنے مہنگے ہسپتال میں لایا کون؟"

یہ ہی سوال بار  ۔بار ذہن میں اٹھتا رہا۔  

شام کو بیوی کے آتے ہی انھوں نے یہ سوال پوچھا۔ ۔  

"مجھے یہاں کون لایا؟ 

" آپکے دوست "

" میرے دوست!"  انھیں حیرت ہوئ۔

"ہاں اس وقت جس طرح آپکے دوستوں نے مدد کی ہے ۔ میں بتا نہیں سکتی۔ ا" بیوی آبدیدہ ہو گئیں ۔ یہ ہی تشکّر کے آنسو شاد صاحب کی آنکھوں میں بھی چمکنے لگے۔ 

 دوسرے دن عظمی صاحب ملنے آئے تو شاد صاحب نے گلوکوز کی نلکی لگا ہوا ہاتھ اٹھایا اور شاد صاحب کے ہاتھ پر رکھ دیا۔۔۔ آنکھوں سے موتی برسنے لگے ۔۔۔۔ 

عظمی صاحب نے انکے بولنے سے پہلے ہونٹوں پر انگلی رکھ دی۔ ۔ ۔ وہ جانتے تھے کہ شاد صاحب کیا کہنا چاہتے ہیں آخر انکے بچپن کے یار غار تھے ۔!!! 

" ڈاکٹر نے بولنے سے منع کیا ہے ۔!"

"اچھا میرے رفیقںوں کی خیریت تو سناؤ۔"

" سب خیریت سے ہیں، تم جلدی سے صحتیاب ہو جاؤ پھر یارانِ کہن کی محفلیں سجیں گی ۔ " عظمی صاحب کچھ دیر اور بیٹھتے لیکن نرس نے آکر اٹھا دیا ۔

" ملنے کا وقت ختم ہوا۔ " 

" سسٹر آپ لوگ یہ کیوں نہیں سمجھتے کہ اپنوں کی قربت مریض کے لئےدوا سے زیادہ چارہ گری کرتی ہے ۔" اعظمی صاحب کل صبح تک کی تنہائی کے عزاب سے خائف تھے۔ 

" انفیکشن کا خطرہ رہتا ہے ۔اس لئے مریض کو زیادہ لوگوں سے ملنے کی اجازت نہیں دیتے " نرس نے انکا بی۔ پی چیک کرتے ہوئے کہا ۔ 

کچھ دنوں بعد انھیں روم میں شفٹ کر دیا ۔اب طبیعت قدرے بہتر تھی۔ ۔۔ 

 دوست احباب ملنے آنے لگے ۔ انھیں اپنے دوستوں کی محبت کا احساس ہو گیا تھا ۔ ان کا گردہ ٹرانس پلانٹ کر دیا گیا ۔اور ڈونر کون انکا پیارا دوست" راہی،،  وہ زندگی سے مایوس ہو چکے تھے۔ لیکن اب زندگی مسکرا رہی تھی۔ ۔ 

         ایک دن ہسپتال میں کچھ زیادہ ہی گہما گہمی تھی۔ اسٹاف بہت زیادہ مستعد۔ ۔ ۔

نرس سے پتا چلا کہ۔۔ 

" مرکزی کابینہ منسٹر ہیں ۔ ایسا بخار ہے کہ اترتا ہی نہیں ۔ اور بے ہوشی ٹوٹتی نہیں ۔ تمام اعضاء بیکار ہوتے جا رہے ہیں ۔ ڈاکٹر پریشان! انکی قابلیت پرنکتہ چینی ہو رہی ہے ۔ ۔ ۔  روز سیاست دانوں کی آمد اور انکے پروٹوکول سے  اسٹاف کی کارگردگی میں خلل پڑ رہا تھا ۔ 

عظمی صاحب آئے تو حالات ِ حاضرہ پر گفتگو ہوئ ۔ 

"منسٹر صاحب کو علاج کے لئےامریکہ کیوں نہیں لے   جا رہے ؟ ملک میں تو غریب عوام علاج کراتے ہیں ۔ " شاد صاحب سیاست اور سیاست دانوں سے بہت نالاں تھے۔ ۔ 

" پہلی فرصت میں لے جائیں لیکن کچھ تو سدھار ہو ۔ غریب عوام کی بد دعائیں ہیں کہ زر وجواہر سے بھری تجوریاں بھی کسی کام نہیں آ رہی ہیں "۔ ۔  عظمی صاحب نے بھی جلے دل کے پھپھولے پھوڑے۔۔۔۔۔۔۔۔۔

کیونکہ ان دونوں نے سیاست دانوں کے در پر علاج کے لئے کتنے چکّر لگائے کہ ۔۔  

ایک عظیم ادیب موت اور زندگی کی کشمکش میں خوار ہو رہا ہے، اگر سرکاری امداد مل جائے تو زندگی کی ہاری ہوئی بازی جیت جائے ۔اور اعلی تخلیقات وجود میں آئیں جو کسی بھی ملک اور قوم کا سرمایہ ہوتی ہیں ۔۔۔۔۔

لیکن انکی موٹی چمڑی پر کچھ اثر نہ ہوا ۔ 

   اخبارات میں منسٹر صاحب کی علالت کے متعلق روز بیان جاری ہوتے۔ سیاست دانوں کی ہر وقت کی آمد سے دوسرے مریضوں کے  عزیز رشتہ داروں سے ملنے پر پابندی عائد ہو گئ۔ شاد صاحب بہت بے چین تھے ۔ 

اسٹاف کی توجہ بھی دوسرے مریضوں پر سے کم ہو گئ۔۔۔۔۔ ۔ 

غفلت کی وجہ سے شاد صاحب انفیکشن کا شکار ہو گئے ۔ ایک مرتبہ پھر زندگی کا چراغ ٹمٹمانے لگا ۔  

یہ خبر بھی عام ہو گئ ۔ ہر لب پر دعائیں اور آنکھوں میں آنسو تھے۔ ہر مذہب و ملّت کے لوگ دعاگو تھے ۔ آئ ۔ سی ۔ یو میں دونوں کے بیڈ قریب ۔۔۔۔۔۔۔۔۔۔ زندگی اور موت کی کشمکش میں مبتلا ۔۔۔۔  منسٹر صاحب کے نزدیک ہر وقت اسٹاف موجود رہتا ؛ لیکن ساری محنت رائیگاں گئ۔۔۔۔۔۔۔۔۔۔۔۔۔۔۔۔۔۔۔۔۔۔۔۔ منسٹر صاحب  اس دارِ فانی سے کوچ کر گئے ۔ ۔

شاد صاحب کے عزیز و احباب کے دل سے نکلی دعائیں رنگ لائیں ۔ موت کے آہنی پنجوں سے آزاد کرا لائیں ۔ ۔  

دونوں کے چاہنے والوں کا مجمع باہر لگا تھا ۔ ۔ انکے چاہنے والوں کے چہرے کھلے ہوئے تھے۔ 

اخبارات میں منسٹر صاحب کی جھوٹی تعریفوں اور کارگردگی سے صفحہ کالے ہو رہے تھے ۔اور ایک کونے میں مختصر سی خبر ۔۔۔۔ 

" ساہتیہ اکادمی اوارڈ یافتہ  شاد صاحب صحتیاب ہو گئے ۔"۔۔۔۔۔۔۔۔۔

                       ختم شد