افیم کی گولی: مقصود حسن

بزمِ افسانہ کی پیش کش 

سترہواں ایونٹ 

رنگ و آہنگ 

افسانہ نمبر : 09 

         *افیم کی گولی*

                  مقصود حسن 

گھر ہو یا اسکول، ایک کتابی کیڑے کو عموماً سبھی پسند کرتے ہیں اور اگر اس کے ساتھ " پڑھاکو" کا ٹیگ لگ جائے تو والدین ایسے بچوں کو بڑی محبت کی نظر سے دیکھتے ہیں ـ لیکن کچھ کتابی کیڑوں کیلئے" کچی عمر " میں " پکی کتابوں" کا مطالعہ اکثر ان کی پٹائی کا سبب بھی بن جاتا ہے ـ اسد کے ساتھ بھی یہی معاملہ درپیش ہوا تھا ـ جب ایک دوپہر اس کے تکیے کے نیچے سے ابن صفی کا جاسوسی ناول برآمد ہوا تھا ـ ـ ـ ـ

موسم سرما کی چھٹیوں کے دن تھے، ان دنوں اسد اپنے کمرے میں کچھ زیادہ ہی " گھسا" رہتا تھا ـ ـ ـ ـ کئی بار اس کے والد نے محسوس کیا کہ اچانک انہیں دیکھ کر وہ کچھ چھپانے کی کوشش کر رہا ہو ـ وہ ایک سخت گیر باپ تھے مگر دنیا شناس بھی تھے ـ جلد ہی وہ بھانپ گئے کہ کہیں تو کچھ گڑبڑ ہے ـ اور پھر ایک دن چوری پکڑی گئی ـ ـ ـ ـ اسد کو بہت ڈانٹ پڑی تھی اور اس ڈانٹ نے ہی یہ راز افشاں کر دیا کہ خاندان میں ایک اور" افیمچی" پیدا ہو گیا ہے ـ ویسے بھی جس خاندان میں سبھی ابن صفی کے جاسوسی ناولوں کے دیوانے ہوں، وہاں ایک کتابی کیڑے کو اس کا چسکا نہ لگے، یہ کوئی غیر فطری بات نہیں تھی ـ 

اسد کا پشتینی مکان تھا، جس میں ابھی بھی پوری فیملی ایک ساتھ رہتی تھی ـ اسکی فیملی، اس کے چچاؤں کی فیملی اور چھوٹے دادا کا خاندان ـ ہاں ،چولہے سب کے الگ کر دیے گئے تھے ـ شام کو ناشتے کے وقت گھر کے آنگن ہی میں اڈہ جمتا تھا ـ گھر کی عورتیں، بڑے بوڑھے، سبھی چارپائی، آرام کرسی، اور چٹائی بچھا کر اکٹھا ہو جاتے تھے اور دنیا جہان کی باتیں ہوتی تھیں ـ انھی اڈوں پر اسد نے اکثر و بیشتر ابن صفی کا نام سنا تھا اور اس طرح اسے بھی ابن صفی کے جاسوسی ناولوں کا چسکا لگ گیا تھا ـ 

اس شام آنگن میں بیٹھے لوگوں میں ایک خوشی کی لہر دوڑ گئی تھی، اس کی کزن بہنوں نے با قاعدہ ابن صفی کی دنیا میں اسد کا استقبال کیا تھا ـ کچھ کزن بھائی اس کی طرف ایسی نگاہوں سے دیکھ رہے تھے کہ گویا کہہ رہے ہو " بیٹا، تم بھی چھپے رستم نکلے ـ ـ ـ ـ "

 سبھی کو اپنی طرف متوجہ دیکھ کر اسد کچھ جھینپ سا گیا تھا ـ پھر اس کے دادا جان نے اسے سمجھایا کہ وہ فی الحال نصابی کتابوں پر اپنی توجہ مرکوز کرے، جاسوسی کتابیں پڑھنے کیلئے ابھی پوری عمر پڑی ہے ـ 

شروع شروع میں اسد نے چوری چھپے اپنے گھر میں موجود ابن صفی کے کلیکشن کو چاٹ ڈالا ـ اگرچہ اس کے گھر پر ہر ماہ " ہما" اور " چہار رنگ" جیسے ڈائجسٹ بڑی پابندی سے آتے تھے مگر وہ پورے مہینے مختلف ہاتھوں میں " گھومتے" رہتے اور اسد کے ہاتھوں میں ان کا آنا محال ہی نظر آتا تھا ـ چنانچہ محلے میں موجود " بھارتی لائبریری" کو اسد نے کھنگالنا شروع کیا ـ " ہما"، " صدہا رنگ"، " چہار رنگ" جیسے ڈائجسٹوں کو کھوج کھوج کر نکالتا تھا اور ان میں چھپے ابن صفی کے ناولوں کو" نگلنا" شروع کر دیتا تھا ـ کتنی بار اسے اپنے والد کی ڈانٹ سننی پڑی مگر نشہ ایسا تھا کہ چھڑائے نہ چھٹے!! کبھی کبھی یوں بھی ہوا کہ ایک ہی رات میں پورے کا پورا ناول ختم کر ڈالا اور فجر کی نماز کے بعد ہی اس کی آنکھ لگی - 

                     * *

کالج سے فارغ ہونے کے بعد اسد کو ایک پرائیوٹ انشورنس کمپنی میں نوکری مل گئی تھی اور اس سلسلے میں اسے اپنے گھر سے دور چنّئی شہر میں منتقل ہونا پڑا تھا ـ یہ پہلا موقع تھا جب اسے گھر سے دور رہنا پڑ رہا تھا، ایک ہفتے کے اکیلے پن نے ہی اسے احساس دلا دیا کہ زندگی گزارنا کتنا مشکل کام ہے ـ تینوں وقت کا کھانا باہر ہی کھانا, دیر رات تک فلیٹ پر لوٹنا اور پھر بستر پر ایسا گرنا کہ کچھ ہوش نہ ہوں, یہ اسکی زندگی کا معمول بن گیا تھا ـ دن رات کیسے گزرتے, اسے کچھ خیال تک نہ رہتا, کبھی کبھی تو حیرت ہوتی کہ کام کی مصروفیت کی وجہ سے اسے تاریخ یا دن کے نام تک یاد نہ رہتے, گویا اس کی زندگی میں کلینڈر کا وجود ہی ختم ہو گیا تھا!!

اسد اکثر سوچا کرتا کہ اس پرائیویٹ سیکٹر کی نوکری نے اسے بالکل مشین میں تبدیل کر کے رکھ دیا ہے ـ انسان ہونے کی وہ ایک سزا کاٹ رہا تھا ـ کاش! وہ مشین کی طرح کبھی کبھار خراب ہو سکتا تاکہ اسے کچھ وقت کیلئے آرام مل سکے یا اسے کسی کونے میں کچھ دیر کیلئے پھینکا جا سکے ـ مصروفیت ایسی ہوتی تھی کہ اسے سانس لینے تک کی فرصت نہ ملتی, اسکی فرسٹریشن اپنی انتہا پر تھی ـ اس طرح دو سال کیسے گزر گئے اسے کچھ پتا بھی نہیں چلا ـ زندگی میں تفریح کے نام پر صرف ہر اتوار کو مال (Mall)جانا, فلمیں دیکھنا اور اپنے کلیگ کے ساتھ فاسٹ فوڈ کھانا ہی رہ گیا تھا ـ اکیلے پن نے اسے ایک چین اسموکر میں بدل دیا تھا ـ 

ایک دن گھر سے اسکے والد کا فون آیا ـ اگلے مہینے کی پانچ تاریخ کو اسکے کزن بھائی کی شادی طے ہوئی تھی, چنانچہ اسے چھٹی لیکر گھر آنے کی تاکید کی گئی تھی ـ پہلے تو اسے اپنے والد کی باتوں پر ہنسی آئی، گویا چھٹی لینا اسکے والد کی نظر میں کوئی معمولی بات ہو ، مگر اسد ہی جانتا تھا کہ چھٹی کا نام لینے سے ہی اسکے باس کو سانپ سونگھ لیتا تھا ـ آفس میں اسکے باس نے ایسا ماحول بنا کر رکھا تھا کہ گویا کچھ دنوں کیلئے چھٹی مانگنا کوئی گناہ ہو ـ چنانچہ اسد کو چھٹی کیلئے اپنے باس کے سامنے گڑگڑانا پڑا ـ چونکہ پچھلے کئی مہینوں سے وہ گھر نہیں گیا تھا, اس لئے بہت ہی منت سماجت کے بعد اسے دو ہفتے کی چھٹی منظور ہو گئی ـ جب گھر جانے کیلئے وہ ٹرین پر سوار ہوا تو اسے یوں محسوس ہونے لگا کہ جیسے اسکی روح کسی پنجرے میں برسوں قید تھی اور اب اسے آزادی ملی ہو ـ ٹرین چلنے کے ساتھ ہی کئی طرح کے خیالات اس کے ذہن میں دوڑنے لگے ـ دل کہہ رہا تھا کہ اب اسے اس ماحول میں دوبارہ نہیں لوٹنا ہے, وہ کہاں آکر پھنس گیا تھا!! اس کام کی زندگی میں ہر طرف صرف بھاگ دوڑ تھی, سارا دن ٹارگٹ, ٹارگٹ ـ ـ ـ ـ ایک دوسرے سے آگے نکلنے کی جدوجہد، نہ کوئی سکون, نہ کوئی جنون ـ ـ ـ ـ زندگی ایک ٹرین کی طرح بس پٹری پر دوڑی جا رہی تھی ـ

                     * * *

اسد جب گھر پہنچا تو اسے ایسا لگا کہ وہ پھر اپنی دنیا میں واپس آ چکا ہے ـ گھر میں شادی بیاہ کے ماحول کی وجہ سے چہل پہل بڑھ گئی تھی ـ کچھ رشتے دار پہلے ہی سے جمع ہوگئے تھے ـ شام کے وقت آنگن میں دوبارہ اڈے شروع ہو گئے ـ لوگ پرانی باتوں کو مزے لے لے کر یاد کرتے, نئے نئے لطیفے سنائے جاتے ـ ایک شام باتوں باتوں میں ابن صفی کا کیا ذکر آیا, گرما گرم بحث ہونے لگی ـ وہاں موجود زیادہ تر لوگ ابن صفی کے رسیا تھے, ایسی بحثوں میں عام طور پر لوگ دو گروپ میں بٹ جاتے تھے, اسکے دادا, والد اور سینئر لوگ فریدی کے مداح تھے اور اسکی طرفداری کرتے تھے جبکہ نسبتاً جوان لوگ عمران کے حامی تھے ـ اسد کے دادا اور والد کو عمران کی بے ہودگی پسند نہیں تھی، جبکہ اسد اور اس کے کزنز کو فریدی کی حد سے زیادہ سنجیدگی بورنگ لگتی تھی ـ یہ بحثیں بہت دلچسپ ہوتی تھیں ـ اسکے دادا کو ان ناولوں کے لمبے لمبے جملے یاد ہوا کرتے تھے، جنہیں دہراتے وقت وہ بہت فخر محسوس کرتے تھے اور اکثر کہتے تھے کہ ابن صفی بہت بڑے مفکر تھے ـ 

شادی کے اس ماحول میں چھٹی کے چار پانچ دن کیسے گزر گئے اسد کو کچھ پتا بھی نہیں چلا ـ ایک رات اسے نیند نہیں آرہی تھی، گیس کی وجہ سے پیٹ بھاری بھاری سا لگ رہا تھا, بستر پر کروٹیں بدلتے وقت اسکی نظریں پلنگ کے سامنے طاق پر رکھے ہوئے ابن صفی کے کچھ ناولوں پر پڑیں ـ یہ ہارڈ باؤنڈ ناول تھے اور ایسا لگتا تھا کہ نئے طور پر خریدے گئے تھے ـ کیونکہ کچھ سالوں پہلے تک گھر میں جو ناول نظر آتے تھے وہ کتابی دنیا کی طرف سے شائع کئے گئے ہوتے تھے, وہ پیپر بیک میں آتے تھے ـ 

اسد کے ہاتھ میں جو کتاب تھی, اس کے سبھی ناول پڑھے ہوئے تھے، "لاش گاتی رہی" , "بابا سگ پرست" , " خوشبو کا حملہ" , "مہکتے محافظ"ـ ـ ـ ـ ـ وہ "بابا سگ پرست " کو سرسری طور پر دیکھ رہا تھا مگر دو چار صفحات کی ورق گردانی کے بعد اسے کچھ یاد نہیں رہا کہ کب اس نے سمندر میں غوطہ لگائی اور گہرائی میں اترتا چلا گیا ـ اتنے برسوں کے بعد دوبارہ پڑھنے کے باوجود بھی اس ناول میں وہی تازگی تھی, وہی پہلے جیسا لطف تھا ـ اسے پتا ہی نہیں چلا کہ کب فجر کی اذان ہوگئی ـ جب کھڑکی سے صبح کا اجالا نظر آرہا تھا تو وہ اس وقت پورا ناول ختم کر چکا تھا ـ اس وقت کھڑکی سے باہر نمازی ٹہلتے ہوئے نظر آ رہے تھے ـ اس نے کھڑکی کا پردہ کھینچا اور جلد ہی نیند اسکے کانوں میں سرگوشی کرنے لگی ـ 

اگلے دو تین دن شادی کی مصروفیات میں گزر گئے ـ اِدھر چھٹی کے دن بھی ختم ہو رہے تھے ـ ایک دن صبح کی چائے پر وہ ایک مقامی اردو اخبار کے صفحات الٹ پلٹ رہا تھا ـ زیادہ تر خبریں ایک دن کی پرانی تھیں ـ تبھی اس کی نظر ایک اشتہار پر پڑی اور اسے معلوم ہوا کہ اس وقت کولکتہ کتاب میلہ لگا ہوا تھا ـ اس نے گھڑی دیکھی, دس بج رہے تھے ـ کچھ دوستوں کو فون کیا مگر ورکنگ ڈے ہونے کی وجہ سے وہ مصروف تھے ـ اس نے اکیلے ہی کتاب میلہ جانے کا پروگرام بنا لیا ـ آج سے تقریباً چار پانچ سال پہلے تک ہر سال اپنے دوستوں کے ساتھ کتاب میلہ بڑی پابندی سے جایا کرتا تھا ـ کتابی کیڑا تو تھا ہی وہ,  پسندیدہ کتابوں کی ایک جھلک اسے دیوانہ بنا دیتی تھی ـ میلہ میدان میں داخل ہونے کے بعد مختلف اسٹالوں میں گھومتا رہتا, پسندیدہ کتابوں کو حسرت بھری نگاہوں سے الٹ پلٹ کر دیکھا کرتا ـ اس وقت ان کتابوں کو حاصل کرنا ایک خواب ہوا کرتا تھا کیونکہ اس کی جیبیں خالی ہوا کرتی تھیں !!

                   * * * *  

کولکاتہ کتاب میلہ بھی ایک بھول بھلیاں سے کم نہیں ہے, اگر آپ کے پاس کتاب میلہ میدان کا نقشہ نہ ہو تو آپ کچھ دیر کے بعد گھوم پھر کر وہیں پہنچ جائیں گے جہاں کچھ دیر پہلے آپ کھڑے تھے ـ ویسے کتابیں تو کم قیمت میں کالج اسٹریٹ سے بھی مل جاتی ہیں، لیکن کولکاتہ کتاب میلے کی بات اور ہے ـ کچھ لوگوں کیلئے یہ میلہ ایک تہوار کی طرح ہے اور کتاب کے عاشق ہر سال اسے ایک تہوار کے طور پر ہی مناتے ہیں ـ اسد بھی اسکول اور کالج کے زمانے میں انھی لوگوں میں شامل تھا جو ہر سال کتاب میلہ کا بے صبری سے انتظار کرتے رہے ہیں ـ 

فروری کی شروعات تھی, دوپہر تین بجے جب اسد کلکتہ کتاب میلہ میدان میں داخل ہوا تو اس وقت دھوپ میں کوئی تپش نہیں تھی, ابھی بھیڑ اپنے شباب پر نہیں پہنچی تھی, اسلئے آرام سے چہل قدمی کی جاسکتی تھی ـ اسد نے سب سے پہلے گیٹ کے پاس ایک اسٹال سے میلہ میدان کا نقشہ حاصل کیا اور پھر اپنے مطلوبہ اسٹالوں کے نمبروں پر دائرہ بناتا رہا ـ اردو کتابوں کے پانچ ہی اسٹال تھے, اس کے علاوہ اس نے چند بنگلہ ادب اور انگریزی زبان کے مشہور پبلیشروں کے اسٹالوں کو بھی منتخب کیا ـ اسد نے پہلے اردو کتابوں کے اسٹالوں کا رخ کیا ـ مغربی بنگال اردو اکیڈمی کے اسٹال پر زیاد تر پرانی اور مقامی مصنفوں کی کتابیں تھیں، جو پہلے سے ہی اس کے پاس موجود تھیں, اس لئے اس نے وہاں زیادہ وقت نہیں گزارا ـ اتنا فائدہ ضرور ہوا کہ کچھ شناساؤں سے ملاقات ہو گئی ـ چنانچہ ان کے ساتھ علیک سلیک کے بعد وہ وہاں سے نکل پڑا ـ اسے دہلی والے اس اسٹال کی تلاش تھی جہاں نئی کتابوں کے ملنے کے امکانات تھے اور ابن صفی کے ناول دستیاب ہو سکتے تھے ـ نقشے کی مدد سے اس اسٹال کو بھی کھوج نکالنے میں اسد کو زیادہ وقت نہیں لگا ـ حسب توقع اسٹال کے اندر زیادہ بھیڑ نہیں تھی,  کتابوں کو بڑے سلیقے سے سجا کر رکھا گیا تھا ـ شاعری کی کتابیں, افسانے, اسلامی ناول, قرآن مجید, مذہبی کتابیں, پکوان کی کتابیں اور ایک طاق پر قطار کی شکل میں ابن صفی کے جاسوسی ناول ـ اتفاق سے ان ناولوں کے پاس دو لڑکیاں کھڑی تھیں اور کچھ نالوں کو الٹ پلٹ کر دیکھ رہی تھیں ـ اسٹال کا مالک انکی طرف مشکوک نگاہوں سے دیکھ رہا تھا ـ ایسا محسوس ہو رہا تھا کہ وہ وہاں کافی دیر سے منڈلا رہی تھیں ـ اسد ان نگاہوں سے اچھی طرح واقف تھا ـ جب آپ کتابیں صرف الٹتے پلٹتے رہیں اور انکی قیمت دیکھ کر انہیں یونہی واپس رکھ دیں تو ظاہر سی بات ہے کہ اسٹال کے مالک کو غصہ آئے گا ہی,  وہ بخوبی سمجھتا ہے کہ آپ ٹائم پاس کرنے آئے ہیں یا آپ کے حلیے سے صاف جھلکتا ہے کہ آپ کی جیب میں پیسے نہیں اور آپ ونڈو شاپنگ کرکے کھسک پڑیں گے ـ 

اسد نے دیکھا کہ دونوں لڑکیاں عمران سیریز کے دو تین ناول, "بیگم ایکس ٹو" , "ڈیڑھ متوالے" اور "جونک کی واپسی" کی ورق گردانی کر رہی تھیں ـ وہ بھی اس گوشے میں پہنچ گیا ـ کچھ ناول کے عنوان پڑھے ہوئے لگ رہے تھے اور بہت سارے ناول اس کے لئے نئے تھے ـ اس نے بھی عمران سیریز کے ناول منتخب کرنا شروع کیا ـ کچھ کتابیں ایسی تھیں جن میں تین -چار ناول اکٹھا کر دیئے گئے تھے ـ لگ بھگ دس کتابیں اسد کو پسند آئیں ـ دکان دار اسد کی طرف تعجب سے دیکھ رہا تھا جبکہ وہ دونوں لڑکیاں کچھ بے چین نظر آ رہی تھیں ـ ان کے ہاتھ میں عمران سیریز کے دو ناول "جونک کی واپسی" اور" ڈیڑھ متوالے" تھے, اسد نے انکی طرف اشارہ کر کے پوچھا کہ کیا وہ انہیں خریدنا چاہتی ہیں ؟ ایک لڑکی جو ذرا تیز لگ رہی تھی, نے جواب دیا " خریدنا تو تھا مگر قیمت بہت زیادہ ہے ؟"

 اس عمر میں ابن صفی کے ناولوں میں اتنی دلچسپی ـ ـ ـ ـ ! یہ بات اسد کیلئے حیران کن بات تھی ـ مزید کریدنے پر پتا چلا کہ وہ دونوں بارہویں جماعت کی طالبہ تھیں, اپنے اسکول کی لائبریری سے ابن صفی کے کچھ جاسوسی ناول پڑھ چکی تھیں اور انکی دیوانی ہو گئی تھیں ـ ابن صفی سے انکی ایک استانی نے ان کا تعارف کرایا تھا ـ ان جاسوسی ناولوں کی وجہ سے انہیں اپنے والدین سے کئی بار ڈانٹ بھی سننی پڑی تھی ـ آج پہلی بار وہ کولکاتہ کتاب میلہ آئی ہوئی تھیں اور ان کا خاص مقصد ابن صفی کے ناول خریدنا تھا ـ اس کے لئے وہ کچھ مہینوں سے پیسے بھی جمع کر رہی تھیں مگر انہیں اس بات کا اندازہ نہیں تھا کہ ان ناولوں کی قیمت اتنی زیادہ ہوگی ـ انہیں کئی ناول پسند آئے تھے لیکن ان کا بجٹ جواب دے چکا تھا ـ وہ اسی کشمکش میں مبتلا تھیں کہ کونسا ناول خریدیں اور کسے چھوڑ دیں ـ اسد کو اپنی طرف متوجہ دیکھ کر وہ اسلامی کتابوں کے طاق کی طرف چلی گئیں مگر ان کا ذہن اسی گوشے کی طرف تھا کیونکہ وہ تھوڑی تھوڑی دیر کے وقفے سے اسکی طرف دیکھ رہی تھیں ـ 

اِدھر اسد اپنے منتخب کئے ہوئے ناولوں کی طرف دوبارہ متوجہ ہوا اور انہیں الٹ پلٹ کر دیکھنے لگا ـ پھر وہ انہیں اٹھا کر کاؤنٹر کی طرف جانے والا ہی تھا کہ اسٹال کا ایک ملازم اس کی مدد کیلئے پہنچ گیا ـ کاؤنٹر کے پاس پہنچ کر اسد نے اپنا پرس نکالا اور پیسے ٹٹولنے لگا، پھر اطمینان کر لینے کے بعد اس نے اسٹال کے مالک کو بل بنانے کیلئے کہا ـ 

اسد نے بل ادا کیا اور صرف دو ناولوں کو اپنے ہاتھ میں لیکر اسٹال کے مالک کو مسکراتے ہوئے آہستگی سے کہا " یہ سب ان لڑکیوں کو دے دیں ـ "

اس نے پلٹ کر دیکھا, وہ دونوں کسی گفتگو میں مشغول تھیں ـ 

اسٹال سے نکل کر وہ تیز قدموں سے کتاب میلے کی بھیڑ میں گم ہو گیا ـ

                    * * * * * 

                     ختم شدہ ـ