واپسی : رخسانہ نازنین

 بزمِ افسانہ کی پیش کش 

سترہواں ایونٹ 

رنگ و آہنگ 

افسانہ نمبر : 13 

                *واپسی* 

                  رخسانہ نازنین

 

" ممی. مجھے 500 روپئے چاہئے. بائیک میں پٹرول ڈلوانا ہے.  ہاں شام میں 2 ہزار روپئے بھی چاہئے .جم کی فیس دینی ہے! " 

سہیل کی بات سنکر ثمینہ کے ماتھے پر بل پڑگئے.

" افوہ.  کہاں مارے مارے پھرتے ہو. چار دن پہلے ہی تو پٹرول کے لئے پیسے دئیے تھے. اور یہ جم کا الگ جنجال پال رکھا ہے. پتہ نہیں آج کل کے لڑکوں کو یہ جم کا کیا شوق چڑھا ہے کوئی وزن بڑھانے کے لئے جم جاتا ہے تو کوئی گھٹانے کے لئے.  ہم نے نہ دیکھے کبھی ایسے چونچلے! "

سہیل اسکی جھلاہٹ پر ہنس پڑا 

" میری پیاری ممی.  آپکا دور گزر گیا.  یہ نیوجنریشن ہے. یہ سب کچھ اب ضروری ہے ـ" 

" یہ لو پیسے . پٹرول ڈال لینا. مگر غیر ضروری سڑکیں مت ناپا کرو.  پتہ ہے نا پاپا واپس آگئے ہیں. کفایت شعاری سے گزر بسر کرنی ہے! " اسکی تاکید سن کر سہیل نے منہ بنا لیا...

" افوہ ممی.  اب بس بھی کیجئے.  یہ نہ کرو ، وہ نہ کرو!  بندہ کرے تو کیا کرے!  میں کتنا جی کو مار کر خرچ کرتا ہوں آپ نہیں جانتیں میرے دوست ہزاروں کی پاکٹ منی چٹکیوں میں اڑادیتے ہیں. ! آپ بس مجھے ہی لیکچر دیتی رہتی ہیں! "

اسکا موڈ خراب ہوگیا اور وہ منہ پھلائے کالج روانہ ہوگیا 

ثمینہ بڑ بڑانے لگی

" اسے تو نصیحت کرنا ہی بے کار ہے.  میں بھی کیا کروں....  محدود آمدنی میں 4 بچوں کے   یہ سارے خرچ کیسے پورے کروں ؟ ایک تو اچھی خاصی دوبئی کی ملازمت چھوڑ آئے جناب عالی..... اور یہ 15 ہزار کی ملازمت کرلی. ! "

ڈرائینگ روم کے صوفے پر بیٹھے اخبار کا  مطالعہ کرتے ہوئے شکیل احمد کے دل میں یہ الفاظ تیر کی مانند گڑ گئے.  جب سے وہ دوبئی کی ملازمت سے استعفی دے کر لوٹے تھےاور یہیں ایک کمپنی میں ملازمت کرلی تھی آئے دن انہیں  یہ طعنے سننے پڑ رہے تھے.  دانستہ نادانستہ بیوی بچوں کی باتیں سنکر وہ خود کو انکا مجرم سمجھنے لگتے. انہیں  پتہ نہیں تھا کہ واپسی انکے گھر والوں کو اس قدر ناگوار گزرے گی.  وہ برسوں سے آسائشوں کے عادی ہوچکے تھے اور اب کفایت شعاری انہیں گوارہ نہ تھی . مگر وہ بھی تھک گئے تھے.  20 برس صحرا کی خاک چھانی تھی. کڑی محنت ومشقت ، بیوی بچوں سے دوری.... اور صحت بھی جواب دے رہی تھی. بی پی اور شوگر کے عارضے کے بعد وہ مزید دوبئی میں قیام کی ہمت نہیں کرپارہے تھے.  اسی لئے اس ملازمت کو خیر باد کہکر لوٹ آئے . سیلز مین کی جاب تھی. جتنا کمایا اتنا خرچ بھی ہوجاتا. یہ اطمینان ضرور تھا کہ خوشحالی نہ سہی تنگدستی بھی نہ تھی.  انہوں نے سوچا   کوئی ملازمت یہیں کر لیں گے.  اور اپنوں کے ساتھ رہیں گے.  مگر انکا فیصلہ غلط ثابت ہوا. ایک کمپنی میں ملازمت مل گئی مگر  اخراجات کے لئے 15 ہزار کی سیلری ناکافی تھی. ثمینہ اور بچوں کی ضروریات کا دامن وسیع تھا. وہ محدود آمدنی میں گزارہ نہیں کرپارہے تھے. انہوں نے ٹھنڈی سانس بھری اور پھر سے اخبار پر نظر دوڑائی مگر دل اچاٹ ہوچکا تھا. اخبار ٹیبل پر رکھا اور کچن میں چلے آئے. ثمینہ پکوان میں مصروف تھی. انہیں  دیکھا تو کہا " اگر فارغ ہیں تو سبزی ، گوشت وغیرہ لے آئیں. آٹو کے  کرائے کی بچت ہوجائے گی. میں ابھی نکلنے ہی والی تھی. "

شکیل احمد کا دل چاہ رہا تھا کچھ دیر اس سے بات کریں . مگر اسکی بات سنکر چپ ہوگئے اور بازار چلے گئے  

مہنگائی کا ذکر یوں تو روز ہوا کرتا ہے مگر جب اسکا سامنا کرنا پڑے تو پسینے چھوٹ جاتے ہیں. سبزیوں کے دام سنکر شکیل احمد  کا سر چکرانے لگا. پتہ نہیں  ثمینہ کا بجٹ کیسے یہ سب کچھ برداشت کرتا ہے! 

گھر پہنچے تو چھوٹی سالی نیہاں آئی ہوئی تھی.  شاپنگ کر کے لوٹی تھی.  ڈھیر سارے سوٹس  ثمینہ کو دکھا رہی تھی.  وہیں زارا اور طہورا بھی تھیں.  شکیل احمد نے دیکھا. ثمینہ کے ساتھ ان دونوں کے چہروں پر بھی مایوسی کے سائے تھے. 

" باجی.  بہترین اسٹاک آیا ہوا ہے.  آپ بھی اپنے اور بچیوں کے لئے شاپنگ کرلیں.  ابھی شادیوں کا سیزن شروع ہونے والا ہے اور خاندان میں کئی تقریبات متوقع ہیں. "

ثمینہ نے بجھے ہوئے لہجے میں کہا.. " نہیں ابھی ہم لوگ شاپنگ کے موقف میں نہیں.  وہی پرانے سوٹس پہن لیں گے.  "

" ارے ہاں. میں تو بھول ہی  گئی تھی. بھائی جان لوٹ آئے ہیں نا!  پتہ نہیں کیا سوجھی انہیں.!  اچھی بھلی جاب چھوڑ آئے!  انڈیا میں کیا ملتا ہے ؟چاہے کتنی ہی محنت کرو  وہی 15- 20 ،  ہزار کی سیلری!  " وہ بہن سے ہمدردی جتا رہی تھی.  ثمینہ خاموش رہی. شکیل احمد کو دیکھا اور انکے ہاتھ سے سبزیوں کے پیکٹس لیتے ہوئے کہا " چائے لاتی ہوں " 

نیہاں بھی انہیں دیکھکر سنبھل گئی اور ادھر ادھر کی باتیں کرنے لگی. مگر شکیل احمد مضطرب ہی رہے.

دو چار دن یونہی گزر گئے.  اس صبح گھر میں ہنگامہ بپا تھا.  نبیل نے گھر سر پہ اٹھا رکھا تھا. کالج کی طرف سے تفریحی ٹور پر لیجایا جارہا تھا. اور  اسے آج ہی 5 ہزار روپئے ٹور کی فیس ادا کرنی تھی.  ثمینہ اسے ٹور پر نہ جانے کو کہہ رہی تھی مگر وہ ضد پہ اڑا ہوا تھا.  " ممی. میرے سب دوست جارہے ہیں. وہ سب انجوائے کریں گے.  ایسے موقع بار بار نہیں آتے. میں نے سب سے کہہ دیا تھا کہ میں بھی آرہا ہوں. اب انکار کرونگا تو سبکی ہوگی.  " " میں سب کچھ سمجھتی ہوں بیٹا مگر 5 ہزار کہاں سے لاؤں ؟" ثمینہ روہانسی ہوگئی.  شکیل احمد کے دل پر ٹیس لگی.  وہ بستر سے اٹھے اور کمرے سے باہر آئے اور نبیل سے کہا 

" بیٹا تم کالج جاؤ. میں ایک گھنٹے میں رقم لے کر کالج آتا ہوں.  فیس جمع کروا دینا! " 

" اوہ. تھینک یو پاپا!  یو آر گریٹ " اسکا چہرہ کھل اٹھا. اور وہ کالج چلا گیا. ثمینہ سوالیہ نگاہوں سے انکی طرف دیکھ رہی تھی. انہوں نے کہا " فکر مت کرو. میں کچھ انتظام کرتا ہوں. " انہوں نے اپنے دوست انور کو فون کیا اور قرض کا مطالبہ کیا. اس نے پہلے تو اپنے اخراجات کی دہائی دی پھر بمشکل احسان جتاتے ہوئے حامی بھری. 

نبیل کے تفریحی ٹور کی فیس ادا کردی گئی مگر انکی عزت نفس کو گہری ٹیس پہنچی. انور کے برے وقت میں انہوں نے کئی بار اسکی مالی مدد کی تھی.  آج پہلی بار انہوں نے اس سے مدد چاہی وہ بھی بطور قرض!  مگر اسکے تیور دیکھکر انہیں جو دکھ محسوس ہوا شاید اسی لئے  قرض کو لعنت کہا گیا ہے.

شکیل احمد حالات کا رخ دیکھکر پریشان ہوگئے تھے. ثمینہ کچھ کہتی نہیں تھی مگر اسکی جامد خاموشی سے انہوں نے بھانپ لیا تھا کہ وہ انکے لوٹ آنے پر خوش نہیں ہے!  

کتنی عجیب بات ہے کہ ضرورتیں اور خواہشیں جذبات واحساسات پر حاوی ہوجاتی ہیں.  ! 

اور پھر آئے دن کی آوازیں انکی سماعت پر ہتھوڑے کی مانند برستی رہیں..... 

" ممی . نیٹ پیک ختم ہوگیا ہے ری چارج کے لئے پیسے چاہئیں !" 

" ممی.  میری دوست کی برتھ ڈے ہے آج. ہم سب کالج میں ہی سلیبریٹ کررہے ہیں.  گفٹ بھی دینا ہے اور کیک وغیرہ کے اخراجات میں بھی حصہ داری ہے. " 

" ثمینہ. کیا بات ہے پارلر نہیں آرہی ہو ؟ فیشل وغیرہ کروانا بھی چھوڑ دیا ہے ؟ " 

" بی بی جی. میری تنخواہ میں اضافہ کرنے کا وعدہ کیا تھا آپ نے ؟" 

" ہاں. لیکن صاحب آگئے نا تو اب ممکن نہیں! " 

" ٹھیک ہے پھر میں بھی اسی وعدے پر کام کررہی تھی. اب اتنی تنخواہ میں نہیں کرسکتی! " ملازمہ کے حتمی لہجے پر ثمینہ کا لہجہ بھیگ سا گیا 

" ٹھیک ہے جیسی تمہاری مرضی.! " 

شکیل احمد نے ملازمہ کے جانے کے بعد کہا " ثمینہ دوسری ملازمہ رکھ لو. تم پر کام کا بوجھ بڑھ جائے گا "

 " اتنے پیسوں میں کوئی کام کرنے کے لئے تیار نہیں. انکے نخرے بہت ہوتے ہیں اور ہم اب افورڈ بھی نہیں کرسکتے!  کرلونگی میں ہی سب کچھ! " ثمینہ کے لہجے میں نادانستہ ہی طنز ابھر آیا. شکیل احمد چور سے بن گئے.

    جیسے جیسے وقت گزرتا رہا انہیں احساس ہوتا گیا کہ انڈیا میں اس قلیل آمدنی میں گزر بسر مشکل ہے. اور بیوی بچے دل مار کر جینے پر مجبور ہورہے ہیں. اسٹیٹس کے مطابق اخراجات بھی ہوا کرتے ہیں.!  مانا کہ خواہشات کی چادر سمیٹ لیں گے مگر ضروریات تو منہ پھاڑے کھڑی تھیں.  

اور ایک شام وہ ثمینہ سے کہہ رہے تھے. 

" ثمینہ. میں کئی دن سے کوشش کررہا تھا. الحمدللہ کامیابی مل گئی. جلد ہی ویزہ آجائے گا. میں پھر سے دوبئی جارہا ہوں! "

 " سچ ؟ ارے واہ چپکے چپکے آپ نے سب تیاری کرلی. بتایا بھی نہیں! "

 وہ خوشی سے چہک اٹھی. بچے بھی فرط مسرت سے جھوم رہے تھے

 " پاپا  خوب سرپرائز دیا آپ نے.  !"

شکیل احمد کا دل تاریک ہوگیا. لبوں پر پھیکی سی مسکراہٹ ابھر آئی. 

 واپسی کاسفر انکے لئے نہایت تکلیف دہ تھا مگر انہوں نے اپنے دل پر پتھر رکھ لیا . ثمینہ اور بچے ہشاش بشاش انہیں ائیر پورٹ تک وداع کرنے آئے تھے.  فلائٹ نے اڑان بھری اور پھر سے صحرا نوردی انکا مقدر بن گئی.

                         ختم شدہ ـ